„His Masters Voice“ á ferð í Reykjanesbæ

Ósköp var ömurlegt að hlusta á Friðjón Einarsson, oddvita Samfylkingarinnar í bæjarstjórn Reykjanessbæjar koma fram í fréttum RÚV-sjónvarps í gærkvöldi, sunnudagskvöld og verja aðgerðarleysi ríkisstjórnarinnar í atvinnumálum á Suðurnesjum.

Á sama tíma og atvinnuleysi á Suðurnesjum er að nálgast 15%, sem er óheyrilegt með öllum þeim afleiðingum, sem slíkt hefur fyrir fólk, kemur kjörinn fulltrúi íbúanna í Reykjanesbæ fram, sem eins konar „His Masters Voice“ og segir að ríkisstjórnin geti ekkert gert!

Hvað var hún þá að skipta sér af málefnum Suðurnesja og byggja upp væntingar með því að halda sérstakan ríkisstjórnarfund þar og lofa öllu fögru?

Ekki batnaði það, þegar „His Masters Voice“, tók sérstakt hliðarspor til þess að ráðast á samstarfsmann Samfylkingarinnar í ríkisstjórn, Ögmund Jónasson, og kenna honum um það, sem miður færi vegna málefna Landhelgisgæzlunnar. Það er gagnlegt fyrir Ögmund að vita hvað að honum snýr frá samstarfsflokknum.

Friðjón Einarsson virðist ekki átta sig á því, að hann var kosinn í bæjarstjórn af fólkinu í Reykjanesbæ en ekki af forystu Samfylkingarinnar. Hann ber ábyrgð gagnvart því fólki en ekki Jóhönnu Sigurðardóttur.

Íbúar Reykjanesbæjar munu áreiðanlega ekki gleyma þessu framtaki bæjarfulltrúans, þegar kemur að næstu kosningum.