Hagnaður bankanna kallar á lækkun gjalda á viðskiptavini

-Ódýrara fyrir bankana að lækka gjöld og minnka vaxtamun en standa í endur­greiðslum vegna of mikils hagnaðar

Það var skynsamleg ákvörðun hjá bankastjórn Landsbankans að tilkynna endurgreiðslur til viðskiptavina í gær. Sama dag tilkynnti bankinn að hagnaður af starfsemi hans á fyrstu þremur mánuðum þessa árs hefði verið tæpir 13 milljarðar króna – á 90 dögum(!)-en á sama tíma í fyrra nam hagnaður rúmum 8 milljörðum.

Verði hagnaður Landsbankans áþekkur aðra hluta ársins gæti hann numið á árinu 2011 um 50 milljörðum króna. Nú er komið í ljós að hagnaður Arionbanka og Íslandsbanka á fyrsta ársfjórðungi nam samtals nær 7 milljörðum króna. Miðað við svipaða afkomu þeirra það sem eftir er ársins gæti heildarhagnaður bankanna á þessu ári numið upp undir 80 milljörðum. Á síðasta ári nam hann samtals hjá bönkunum þremur um 70 milljörðum.

Í þessu ljósi er það ekki bara góðmennska hjá Landsbankanum að endurgreiða viðskiptavinum heldur meira en sjálfsagt.

Hins vegar kemur það á óvart nú eins og vegna hagnaðar bankanna á síðasta ári að það skuli vera hægt að græða svona mikið á bankastarfsemi við núverandi aðstæður á Íslandi, eins og áður hefur verið vikið að hér á Evrópuvaktinni.

Það bendir til þess, að bankarnir séu að taka alltof mikið af viðskiptavinum sínum. Þess vegna kallar hagnaður Landsbankans nú á ítarlega skoðun á rekstri bankanna og ítarlegar umræður á Alþingi með hagsmuni viðskiptavina bankanna í huga.

Það er áreiðanlega ódýrara fyrir bankana að lækka stórlega gjaldtöku af viðskiptavinum og minnka vaxtamun innlána og úrlána verulega í stað þess að standa í endurgreiðslum eftir á vegna oftekinna gjalda.

Það verður spennandi að sjá hvort einhver þingmaður finnur hjá sér hvöt til þess að ræða þetta mál á Alþingi.