Ragnar Arnalds:Hálfvelgja VG í ESB-málum verður flokknum dýrkeypt

Það eru fleiri en þeir, sem skrifa Evrópuvaktina, sem telja, að Vinstri grænir séu komnir í mikla pólitíska erfiðleika vegna afstöðu þeirra til aðildarumsóknar Íslands að ESB. Einn af þeim er Ragnar Arnalds, félagi í Vinstri hreyfingunni –grænt framboð, fyrrverandi formaður Alþýðubandalagsins og fyrrverandi þingmaður og ráðherra þess flokks. Í grein á Vinstrivaktinni segir Ragnar:

„Hætt er við að margir fyrrum kjósendur VG sem andvígir eru aðild treysti ekki flokknum þegar næst verður kosið vegna þess að flokkurinn greiddi götu aðildarumsóknar að ESB. Á hinn bóginn munu þeir sem mikinn áhuga hafa á ESB-aðild styðja Samfylkinguna þar sem stefna VG er að Ísland standi utan við ESB. Fylgið mun því tálgast jafnt og þétt af VG frá báðum hliðum meðan afstaða flokksins í þessu máli er jafn hálfvolg og tvíbent og raun ber vitni.

Æ færri trúa því í alvöru að það þurfi að taka mörg ár „að kíkja í pakkann“ og „sjá hvað í boði er“ eins og afstaða VG var réttlætt með fyrir bráðum tveimur árum. Nú þegar hefur VG orðið fyrir þungum búsifjum út af þessu máli, sbr. nýlegar úrsagnir, og flest bendir til þess að hálfvelgja flokksins í þessu stærsta og örlagaríkasta máli þjóðarinnar eigi eftir að verða flokknum afar dýrkeypt á komandi árum nema forystulið hans taki á sig rögg og segi sig með skýrum hætti frá þessu feigðarflani Samfylkingarinnar í náðarfaðm ESB.“