Bjarni hefur rétt fyrir sér - það á að kalla þingið saman

Bjarni Benediktsson

Alþingi á að sjálfsögðu að ljúka þeim verkum, sem að því snúa. Það er gamaldags skoðun og úrelt afstaða að afgreiða mál með bráðabirgðalögum. Samgöngur eru með þeim hætti, að það er lítil fyrirhöfn að kalla þingið saman með stuttum fyrirvara. Þess vegna er það rétt afstaða hjá Bjarna Benediktssyni, formanni Sjálfstæðisflokksins, að kalla beri þing saman til þess að klára mál, sem þingið „gleymdi“(!) að afgreiða.

Þá er jafnframt hægt að taka stöðu aðildarumsóknar Íslands að Evrópusambandinu og ástandið í Evrulandi til umræðu eins og Bjarni bendir réttilega á.

Ekkert mál er mikilvægara, sem er á dagskrá þjóðmálaumræðunnar en það mál. Evrópa er í uppnámi. Þótt gríska þingið hafi í gær afgreitt fyrri hluta þeirra mála, sem að því snúa og gerir væntanlega það sama í dag er hinu gríska vandamáli Evrulands ekki lokið. Eftir er að sjá hvort götuóeirðir í Aþenu eiga eftir að breiðast út ef og þegar grísk stjórnvöld reyna að framkvæma þau, lög, sem verið er að lögfesta þessa sólarhringana og verða að víðtækum þjóðfélagsóeirðum, sem ekki er hægt að útiloka.

Aðstæður innan Evrópusambandsins eru allt aðrar en þær voru, þegar þingið samþykkti aðildarumsóknina fyrir tveimur árum. Óhætt er að fullyrða að hún yrði aldrei samþykkt í dag í ljósi þróunar ESB á þessum tveimur árum.

Þess vegna er mikilvægt að taka þetta mál til umræðu á þingi nú og undirstrika þar með þann vilja þingsins að viðræður um aðild Íslands eigi ekki að vera í felum heldur fara fram fyrir opnum tjöldum. Þjóðin á rétt á því og reyndar kröfu til að fylgjast með. Aðildarumsóknin er ekki einkamál embættismanna.