Betri þjónusta eða okursjoppur?

Sl. laugardag er talið að allt að 300 þúsund manns hafi gengið um götur Ísrael til þess að mótmæla versnandi lífskjörum þar í landi, háu verðlagi og samþjöppun í viðskiptalífi, þar sem í mesta lagi 10 viðskiptasamsteypur ráða nánast öllu viðskiptalífi landsins þar á meðal helztu fjölmiðlum.

Við þekkjum svona aðgerðir frá götum Reykjavíkur frá því í janúar 2009 og frá októberbyrjun 2010, þegar almenningur mótmælti dugleysi ríkisstjórnar. Fólki er stundum nóg boðið.

Það er margt í umhverfi okkar, sem veldur því að fólki hér á Íslandi er nóg boðið. Evrópuvaktin vakti athygli á skrýtnum 10 aura mun á lítraverði á benzini hjá lágverðs benzínstöðvum fyrir skömmu. Daginn eftir hvarf sá 10 aura munur á milli tveggja af þremur benzínsölum.

Í gær hafði vegfarandi orð á því, að hann hefði furðað sig á verði á hálfum lítra af Egils Kristal vatnsflösku í verzlun N1 á Ártúnshöfða. Þessi flaska kostaði 229 krónur. Sami vegfarandi kvaðst hafa keypt tvo lítra af sama vatni skömmu áður í Krónunni fyrir 198 krónur.

Nú er alkunn sú röksemd seljanda, að verð sé hærra í verzlunum, sem hafa lengur opið en aðrar og þar af leiðandi aukinn kostnaður vegna betri þjónustu. Við nánari athugun kom i ljós að Krónan selur hálfan lítra af þessu vatni á 117 krónur.

Það er nú kannski ósanngjarnt að bera saman verð í Krónunni og hjá N1. En þá kom í lós, að Nóatún selur hálfan lítra af þessu vatni á 148 krónur. Og Nóatúnsverzlanir eru opnar allan sólarhringinn.

Er skýringin á verðmun á einni slíkri flösku á milli N1 og Nóatúns-verðmunurinn er 81 króna - sú, að N1 hafi opið lengur en Nóatún? Er hægt að hafa opið lengur en allan sólarhringinn?!!

Það hefur lengi verið hægt að bjóða neytendum á Íslandi upp á ýmislegt vegna þess að við búum á eyju. Alveg eins og það var hægt að bjóða íbúum og ferðamönnum á þremur grískum eyjum upp á okurverð á benzíni, af því að þeir komust ekkert annað til að kaupa benzín. Grísk stjórnvöld gripu til þess ráðs að setja hámarksverð á benzín á eyjunum, eins og sagt hefur verið frá hér á Evrópuvaktinni.

Fyrirtæki, sem vilja láta taka sig alvarlega eiga ekki að láta standa sig að svona verðlagningu. Þau fá ella það orð á sig að þau reki okursjoppur.

Og þá er kannski stutt í að Íslendingum verði nóg boðið og að þeir fjölmenni út á götur til þess að mótmæla viðskiptaháttum, sem engin rök eru fyrir.

Neytendur eiga nefnilega val. Þeir geta hætt að eiga viðskipti við okursjoppur.