Jóhanna knúsar Füle - hvers vegna þessi leynd yfir ferðinni?

Ŝtefan Füle, stækkunarstjóri ESB, kom óvænt í heimsókn til Íslands miðvikudaginn 19.október. Ég hafði verið skráður í viðtal hjá Füle fyrir viku en á síðustu stundu var fallið frá því að veita viðtalið vegna þess að stækkunarstjórinn yrði á ferðalagi. Sama dag birtist hins vegar grein eftir hann í Morgunblaðinu þar sem hann lýsti ánægju með viðræðurnar við Ísland og taldi þar allt í réttum farvegi.

Forsætisráðuneytið

Jóhanna Sigurðardóttir og Stefan Fule í stjórnarráðshúsinu 19. október 2011.

Í gær hitti ég fulltrúa í stækkunarskrifstofunni á fundi og ræddi við þá í klukkustund. Þar var meðal annars rætt um hvað fyrir ESB vekti á Íslandi með því að koma á laggirnar upplýsingaskrifstofu og hvenær hún yrði opnuð. Svarið var að það yrði gert fyrir áramót en ekki minnst einu orði á að sjálfur Füle væri á leið til Íslands. Tilgangurinn væri að upplýsa Íslendinga um ágæti ESB. Sambandið gripi gjarnan til slíkra aðgerða þegar mikið væri í húfi eins og þegar Írar höfðu sagt nei við Lissabon-sáttmálanum eða Hollendingar. Teldi ESB hallað réttu máli um sig gripi það auðvitað til aðgerða til að rétta hlut sinn.

Eins og kunnugt er hefur ESB lagt áherslu á gegnsæja og upplýsta umræðu. Eitt er víst að það á ekki við þegar Füle á í hlut, samskipti hans við Íslendinga eða upplýsingar um ferðir hans. Á þetta bæði við um fastanefnd Íslands gagnvart ESB og stækkunardeild ESB sjálfa.

Þögnin um heimsókn Füles til Íslands, þar til hann er lentur, kann að stafa af umhyggju fyrir öryggi hans, Að það kynni að hafa varpað skugga á komu hans ef vitað hefði verið um hana fyrirfram og einhverjir hefðu ákveðið að láta í ljós óánægju með komu hans.

Eitt er víst að forráðamenn Samfylkingarinnar eru ekki óánægðir með Füle og samstarfsmenn hans því að Jóhanna Sigurðardóttir forsætisráðherra segir í tilkynningu eftir að hún hitti Füle síðdegis miðvikudaginn 19. október:

„Við erum ánægð með að viðræðuferli Íslands vegna umsóknar um aðild að Evrópusambandinu hefur gengið með ágætum. Stækkunarskrifstofa framkvæmdastjórnarinnar er mikilvægur og traustur samstarfsaðili, bæði aðildarríkjanna og Íslands í því að skipuleggja ferlið og viðræðurnar. Við höfum rætt um frekari skref í ferlinu og sjáum fram á góða samvinnu við opnun stærri kafla sem færa nýjar áskoranir, og finna gagnlegar lausnir sem henta báðum aðilum.“

Textinn vekur athygli vegna þeirrar undirgefni sem gætir í honum gagnvart Füle og samstarfsmönnum hans. Það skyldi enginn sem les þennan texta ætla að um sé að ræða viðmælanda um brýna hagsmuni þjóðarinnar. Þvert á móti er þarna um diplómatíska ástarjátningu að ráða þar sem viðmælandinn er knúsaður og honum þökkum vinsemdin. Hún felst meðal annars í því eins og ég hef lýst annars staðar hér á síðunni að teygja og toga reglur ESB á þann hátt að þær falli að þeim feluleik að ekki sé um neina aðlögun að ræða.

Því má velta fyrir sér hvort Füle hafi sett það sem skilyrði fyrir komu sinni til Íslands að ekki yrði sagt frá ferð hans fyrr en hann yrði lentur og að Jóhanna Sigurðardóttir knúsaði hann fyrir hönd íslensku þjóðarinnar. Það eitt að Jóhanna lét svo lítið að hitta hann verður fært í skýrslur erlendra sendimanna í Reykjavík – hún hefur ekki einu sinni hitt þá alla!

Bj. Bj.