Hreinsanir Jóhönnu og Steingríms J.: Fyrst eru þeir „brennimerktir“ svo eru þeir reknir

mbl.is

Steingrímur J. Sigfússon og Árni Páll Árnason.

Andófsmenn í Sovétríkjunum forðum daga lýstu vinnubrögðum ráðamanna í Kreml á þann veg, að þegar ákvörðun hafði verið tekin um að losna við þá með einhverjum hætti hafi þeir fyrst verið brennimerktir. Þeir lýstu því þannig, að í kringum þá hefði verið skapað „atmosphere of murder“. Þeir voru ekki drepnir eins og áður hafði tíðkazt en þegar sú aðgerð var komin í gang hættu vinir og kunningjar að tala við þá. Það ógnaði hagsmunum þeirra að láta sjá sig í návist hinna brennimerktu.

Forráðamenn núverandi ríkisstjórnar hafa tekið upp sömu vinnubrögð. Þeir „brennimerkja“ einstaka ráðherra, sem þeir ætla að losna við með því að dreifa út sögum um að nú sé komið að þeim. Slíkum sögum var dreift um Kristján Möller, fyrrv. samgönguráðherra áður en hann var settur af.

Jón Bjarnason hefur verið „brennimerktur“ oftar en einu sinni en alltaf hefur Steingrimur J. gefizt upp á fyrirætlunum um að reka hann. Nú hefur Jón Bjarnason verið „brennimerktur“ einu sinni enn. Því lengri tími, sem líður frá því að brennimerkingin fór fram, þeim mun erfiðara verður fyrir Steingrím J. að framkvæma verknaðinn.

Nú hefur Árni Páll Árnason verið „brennimerktur“. Það hefur verið gert með því að dreifa út sögum um að ráðaherratími hans sé á enda. Það væri fróðlegt að vita, hvort Árni Páll er nú þegar farinn að finna fyrir því að þeir, sem hafa ræktað hagsmunavináttu við hann séu að hverfa á braut!

Hitt er forvitnilegt að athuga hverjir það eru, sem Jóhanna losar sig við. Þeir Kristján Möller og Árni Páll hafa orðið þeir ráðherrar Samfylkingar, sem hafa náð mestu jarðsambandi við veruleikann í þjóðlífinu og þá ekki sízt atvinnulífinu.

Eru þeir reknir þess vegna?

Hvað segir „hægri armur“ Samfylkingar? Lætur hann fara svona með sig?

SG