Ísland: Tilraunastofa í efnahagsmálum og þjóðmálum

Wall Street Journal birtir um helgina sérstaka úttekt á efnahagsástandinu á Íslandi eins og það hefur þróazt eftir hrun.

Alþjóðlegur viðskiptaritstjóri Daily Telegraph vísar til Íslands í umfjöllun í blaðinu sínu í dag um hugsanlega upptöku Grikkja á drökmum á ný og telur að reynslan af endurreisn bankakerfisins á Íslandi geti komið að notum í slíku tilviki í Grikklandi.

Kenneth Clarke, dómsmálaráðherra Breta vísar til Íslands, þegar hann þarf að berja á samflokksmönnum sínum vegna ESB-mála og telur þá vilja lifa í „splendid isolation“, eins og Íslendingar geri.

Af hverju kemur Ísland svo oft upp í huga þeirra, sem fjalla um alþjóðleg efnahagsmál og stjórnmál? Bæði Paul Krugmann og Josep Stieglitz, nefna Ísland aftur og aftur til samanburðar í skrifum sínum.

Skýringin er augljós. Þrátt fyrir fámennið og lítið efnahagskerfi eða kannski vegna þess er Ísland eins og lítil tilraunastofa bæði í efnahagsmálum og þjóðmálum almennt. Hér má sjá hvað gengur og hvað gengur ekki.

Við eigum að nýta þessa stöðu sjálfum okkur til framdráttar. Fámennið og aðstæður allar valda því að við getum verið í forystu þjóða um framþróun og uppbyggingu lýðræðis.

Við getum tekið við forystunni af Svisslendingum og sýnt fram á hvernig hægt er með tölvutækni og samskiptamiðlum nútímans að þróa lýðræðið á þann veg, að þjóðin í heild og smærri einingar hennar þegar það á við, taki ákvarðanir í eigin málum í þjóðaratkvæðagreiðslum.

Slík forysta væri í anda sögu þeirrar þjóðar, sem kom upp einu elzta þjóðþingi í heimi.

SG