Visir.is: Enn ein furðufréttin um að Íslendingar fái sérlausnir innan ESB - það veit enginn enn hver er samningsafstaða Íslands

Dóra Sif Tynes talar á fundi ESB-aðildarinna.

Furðufréttir um það sem kunni að gerast í viðræðum Íslendinga við fulltrúa ESB hafa birst jafnt og þétt í íslenskum fjölmiðlum árum saman. Heimildarmenn slíkra frétta eru að jafnaði þeir sem hafa gert upp við að Íslendingar eigi að ganga í ESB. Þeir hafa sannfært sjálfa sig um að staðan innan ESB sé allt önnur en hún er. Á alþingi sést þetta best núna þegar Mörður Árnason. þingmaður Samfylkingarinnar, segir allt óbreytt innan ESB frá því að sótt var um aðild að sambandinu árið 2009 og Jóhanna Sigurðardóttir forsætisráðherra segir um evruna: „„Ástæðulaust að hafa áhyggjur fyrirfram af stöðunni.“

Einn angi þessarar blindu gagnvart ESB er að halda því fram að Íslendingum verði tryggðar sérlausnir sem komi í veg fyrir að íslenskur lánbúnaður verði að engu og ESB ráði lögum og lofum á íslenskum fiskimiðum en íslensk skip veiði þar ein vegna vilyrða frá Brussel í krafti reglu um hlutfallslegan stöðugleika sem hvergi er til í neinum sáttmála heldur ræðst af samþykkt ráðherrafunda ESB þar sem meirihluti atkvæða ræður eins og birtist nýlega á 20 stunda samningafundi ráðherranna um nýja fiskveiðistefnu ESB sem lyktaði í máttlausri málamiðlun.

Hinn 15. júní birtist frétt á visir.is undir fyrirsögninni: Fáum sérlausnir ef Evrópusambandið er samkvæmt sjálfu sér. Sú sem lýsir þessari trú á ESB er Dóra Sif Tynes hdl. en hún starfaði hjá Eftirlitsstofnun EFTA í Brussel og sérsvið hennar er m.a Evrópuréttur, segir í kynningu á henni. Í fréttinni segir: „Dóra Sif segir að erfitt sé að fullyrða neitt um sjávarútvegsmálin, sérstaklega þar sem kafli um sjávarútveg hafi ekki enn verið opnaður, en samið hafi verið áður um ýmis konar sérlausnir og fordæmin tali sínu máli.“

Dóra Sif tíundar síðan gamalkunn rök um að Finnar hafi fengið leyfi til að greiða hærri styrki úr ríkissjóði sínum til bænda á heimskautasvæðum en ESB-sjóðir greiddu þeim. Maltverjar hafi fengið sérreglu vegna ótta við að útlendingar mundu kaupa eyjuna eða eyjur þeirra undir sumarhús og sérregla hafði verið mótuð vegna sameiningar Þýskalands. Rómarsáttmálinn gerði ráð fyrir sérlausnum.

Allt er þetta gott og blessað en segir alls ekki neitt um hvernig tekið verður á málefnum Íslands. Þeir sem nú takast á um framtíð evrunnar eru ekki endilega þeirrar skoðunar að ESB sé samkvæmt sjálfu sér. Enginn veit í raun um hvaða ESB er að ræða andspænis evru-vandanum, það er „lamað“ að mati Le Figaro vegna ágreinings Frakka og Þjóðverja.

Stefán Haukur Jóhannesson, formaður viðræðunefndar Íslands gagnvart ESB, talaði um sérlausnir í landbúnaðarmálum í nýlegu áróðursblaði ESB-aðildarsinna ætluðu bændum. Bændasamtök Íslands sendu bréf til stjórnarráðsins og vildu vita hvað formaðurinn hefði fyrir sér. Fréttir hafa ekki borist af svari. Vandinn er nefnilega sá að Íslendingar hafa ekki kynnt ESB neina samningsafstöðu í landbúnaðarmálum svo að vitað sé.

Þá veit enginn heldur hver er samningsafstaða Íslands í sjávarútvegsmálum. Hún hefur hvergi verið kynnt og ESB vill ekki ræða málið fyrr en það hefur mótað nýja sjávarútvegsstefnu sína, kannski ekki fyrr en á árinu 2014.

Með fullri virðingu fyrir Dóru Sif og þeim sem stóðu að fréttinni á visir.is 15. júní skal því haldið fram að allar skýringar hennar um lög og reglur ESB, fordæmi frá Finnlandi, Möltu og Þýskalandi séu sama marki brenndar og yfirlýsingar Marðar og Jóhönnu, með öllu innstæðulausar miðað við framvindu mála innan ESB.

ESB-aðildarsinnar skemmta sér stundum við að gera grín að þeim sem segja furðusögur af regluverki ESB, að agúrkur eigi að vera að vissri lengd og ekki of bognar eða tómatar eigi að bera sérstakan rauðan lit o.s. frv.. Hið undarlega við þær furðusögur er að sannleiksgildi þeirra reynist oft meira en það sem felst í furðuyfirlýsingum ESB-aðildarsinna á Íslandi sem tala þó ávallt í anda „upplýstrar umræðu“ eins og allir vita.

Bj. Bj.