Ráðherrastörf geta verið afhjúpandi

David Cameron og George Osborne

George Osborne, fjármálaráðherra Breta, sem lengi hefur verið talinn líklegur eftirmaður David Cameron, sem leiðtogi Íhaldsflokksins á ekki sjö dagana sæla um þessar mundir. Fyrir helgi birtist fréttaskýring í Guardian, þar sem segir, að Osborne hafi fyrirgert möguleikum sínum til að taka við af Cameron, annars vegar vegna þess að hann hafi klúðrað síðasta fjárlagafrumvarpi ríkisstjórnarinnar og hins vegar vegna þess að hann hafi verið á hálum ís í deilum við Ed Balls, sem er talsmaður Verkamannaflokksins í fjármálum í skuggaráðuneyti Ed Miliband og geti ekki staðið við stóru orðin. Guardian segir að nú sé horft til Williams Hague, utanríkisráðherra og fyrrverandi leiðtoga flokksins til þess að taka við af Cameron, þótt Hague sjálfur sé því andvígur.

En jafnframt birtist fyrir helgi grein í Daily Telegraph, eftir Charles Moore, fyrrverandi ritstjóra blaðsins, þar sem segir að ef Osborne hafi ekkert betra við tíma sinn að gera en standa í ómerkilegu þrasi í þinginu við Ed Balls fari bezt á því að færa hann í annað ráðherraembætti og skapa honum stöðu og vettvang, þar sem hann geti stundað slíkt orðaskak en skipa annan mann í embætti fjármálaráðherra, sem hafi áhuga á þeim verkefnum, sem þar sé við að fást.

Í þessu sambandi er nauðsynlegt að hafa í huga að Daily Telegraph hefur áratugum saman verið talið bezta vitnið um hvað menn éu að hugsa í innsta kjarna Íhaldsflokksins.

Áður hefur þingmaður Íhaldsflokksins haft á orði, að Cameron og Osborne væru puntudrengir (posh Boys)

Stundum eru ráðherrastörf afhjúpandi - eins og við þekkjum hér.

SG