Ásta Ragnheiður sannfærir Mörð algjörlega – en um hvað?

Fréttablaðið ræðir föstudaginn 13. júlí við Ástu Ragnheiði Jóhannesdóttur, forseta alþingis, um tillögu að nýju skipulagi í nágrenni við Alþingishúsið. Forseti þingsins segir meðal annars:

Ásta Ragnheiður Jóhannesdóttir

„Almennt er það þannig að þinghús hafa gott rými í kringum sig og það er ekki byggt ofan í þau. Ég held að við eigum að hafa það stolt gagnvart löggjafarsamkundunni að gefa henni gott rými og að þessi fallegu, gömlu hús fái að njóta sín. Það munu þau ekki gera ef þetta verður að veruleika.“

Megináhyggjuefni forseta alþingis er að um of verði þrengt að Alþingishúsinu. Hún bendir réttilega á að almennt sjái menn til þess að þinghús njóti svigrúms í virðingarskyni. Þeir sem sótt hafa heim höfuðborgir Norðurlanda vita að þinghúsin standa sér hvert á sinn hátt í borgunum og ekki hefur verið kappsmál þeirra sem annast skipulagsmál að breyta næsta nágrenni húsanna í vinsæl öl- eða víndrykkjusvæði eða athafnasvæði vegna ferðaþjónustu. Alls staðar eru skýr skil milli hæfilegs „virðingarsvæðis“ þinghússins og hins almenna borgarlífs. Þessi skil eru á undanhaldi hér á landi samhliða minnkandi virðingu alþingis.

Í samtalinu við Fréttablaðið lýsir Ásta Ragnheiður áhyggjum af umferð í næsta nágrenni þinghússins vegna fjölmargra hótela og segir: „Það er geysileg umferð um Kirkjustræti og Aðalstræti og hér standa rútur, trukkar, háfjallabílar og bílaleigubílar þvers og kruss um allt og það er nánast ekki hægt að komast hér að. Mér finnst það ekki boðlegt löggjafanum að fá svona mikið byggingamagn á svæðið.“

Það er til marks um vinarþelið milli fólks í þingflokki Samfylkingarinnar að Fréttablaðinu með ummælum Ástu Ragnheiðar hafði varla verið dreift þegar Mörður Árnason, þingmaður Samfylkingarinnar, sagði á bloggsíðu sinni:

„Eftir ýmsar efasemdir um nýju miðbæjartillöguna sannfærðist maður algerlega í Fréttablaðinu í morgun – þar sem forseti alþingis færði okkur þau viðhorf um skipulagsmál kringum Austurvöll að umfram allt þyrfti að tryggja framhaldslíf bílastæða við vestanvert Kirkjustræti.“

Eða er þetta ekki vinarþel? Á að skilja orð Marðar þannig að hann hafi sannfærst „algerlega“ um að miðbæjartillagan, sem hann kallar svo, eigi rétt á sér eftir að Ásta Ragnheiður þingforseti mótmælti henni?

Merði finnst eðlilegt að njóli setji sterkan svip á græn svæði borgarinnar. Hann telur njóla kannski ekki eiga heima á Austurvelli til heiðurs Alþingishúsinu?