Steingrímur J. í bullandi vörn í makrílmálinu - grípur til Icesave-takta

Óli Björn Kárason heldur úti vefsíðunni www.t24.is. Hann vitnar þriðjudaginn 17. júlí í leiðara Evrópuvaktarinnar sama dag þar sem segir:

„Hvers vegna samþykkti Steingrímur J. að sækja makrílfund með Damanaki í London 3. september ef hann telur að krafa eða tal um refsiaðgerðir spilli fyrir viðræðum þeirra? Af hverju setur hann ekki fram þá kröfu að allar hótanir um refsiaðgerðir verði dregnar til baka áður en hann sest að viðræðuborðinu?

Það er ekki nóg að refsihótunum sé beint að yfirvöldum sjávarútvegsmála á Íslandi. Yfir utanríkisráðuneytinu hangir pólitísk hótun um að ekki verði rætt við Íslendinga um sjávarútvegsmál í ESB-aðildarviðræðunum nema makríldeilan leysist.“

Óli Björn segir að leiðarinn hafi birst rétt eftir kl. 10 í morgun en hinn 14.39 hafi mbl.is sagt frá því að Steingrímur J. segi hótanir Evrópusambandsins um refsiaðgerðir áróður. Mbl.is vitnar til viðtals AFP fréttastofunnar við sjávarútvegsráðherra. Þar segir:

„Steingrímur J. Sigfússon, sjávarútvegs- og landbúnaðarráðherra, segir í viðtali við AFP fréttastofuna að hótanir Írlands og ESB um refsiaðgerðir gegn Íslandi í makríldeilunni séu áróður.“

Síðar segir í frétt Mbl:

„Steingrímur segir við AFP að makríllinn haldi til á íslensku hafsvæði og éti frá öðrum fisktegundum. “Við munum ekki bogna undan þrýstingi og munum standa við okkar sjónarmið,„ segir Steingrímur.“

Óli Björn veltir fyrir sér hvort Steingrímur J. sé að svara leiðara Evrópuvaktarinnar og raunar einnig forvera sínum Jóni Bjarnasyni, sem hafi gagnrýnt hvernig haldið sé á málum í makríldeilunni.

Um leið og vakin er athygli á þessu mati Óla Björns má fullyrða að almennt sé Steingrímur J. í vörn í makríldeilunn eins og kemur fram í þeirri staðreynd að hann lætur sig hafa að samþykkja viðræður við ESB undir hótunum um refsiaðgerðir. Hvernig veit ráðherrann að hótanir Írlands og ESB um refsiaðgerðir séu áróður? Hefur honum verið sagt það á bakvið tjöldin á trúnaðarfundum hans með Mariu Damanaki sjávarútvegsstjóra?

Steingrímur J. verður að halda á annan veg á málstað Íslands út á við. Það eina sem vantaði í svör Steingríms J. var að hótanir ESB gegn Íslendingum væru til heimabrúks fyrir Mariu Damanaki. Þetta hafa löngum verið lokarök hans þegar erlendir ráðamenn sækja gegn íslenskum hagsmunum. - Þannig talaði Steingrímur J. til dæmis um fjármálaráðherra Hollendinga á tímum Icesave-deilunnar áður en hann lét undan þrýstingi Hollendinga og Breta og hætti varðstöðu um hagsmuni Íslands.

Bj. Bj.