Byrjar Ögmundur rannsóknina vegna Langaness og Huangs hjá Steingrími J.? Hann hefur veitt Halldóri Jóhannssyni frítt spil

Með ólíkindum er að fylgjast með því uppnámi sem verður jafnan innan stjórnarráðsins þegar fjallað er um málefni erlendra fjárfesta. Skemmst er að minnast þess hvernig tekist var á um það innan og milli stjórnarflokkanna þegar Magma hreiðraði um sig í jarðvarma á Reykjanesi. Steingrímur J. Sigfússon (VG) lék tveimur skjöldum í Magma-málinu eins og svo mörgum öðrum.

Finnafjörður

Nú snýst málið um Langanes og Grímsstaði á Fjöllum. Upplýst er að umboðsmaður Huangs Nubos á Íslandi, Halldór Jóhannsson, hefur unnið að því á vegum sveitarstjórnar á Langanesi að skipuleggja þar olíuhreinsunsarstöð (græna?) og eitthvað fleira á meðan athygli beinist að jarðakaupum Huangs á hálendinu. Menn velta fyrir sér í hvers umboði þetta allt hafi verið gert. Böndin berast að Steingrími J. Sigfússyni eins og svo oft áður þegar mál komast á grá svæði.

Á forsíðu Morgunblaðsins skrifar Baldur Arnarson frétt 25. júlí um að Ögmundur Jónasson innanríkisráðherra (VG) hyggist beita sér fyrir rannsókn á því hvort einhver tengsl kunni að vera á milli áhuga Huangs Nubos á að fjárfesta í Grímsstöðum á Fjöllum og áætlana um stórfellda uppbyggingu hafnarmannvirkja í Finnafirði sem Halldór Jóhannsson hefur skipulagt.

Innanríkisráðherrann fer með yfirstjórn sveitarstjórnarmála og honum bregður þegar hann les í blöðum að Þorsteinn Steinsson, sveitarstjóri á Vopnafirði, sjái fyrir sér í byggðarlagi sínu umskipunarhöfn sem „keppi við Súez-skurðinn“.

„Ég tel að það eigi ekki að vera á hendi einstaks sveitarfélags á Norðausturlandi að taka ákvörðun af þessu tagi,“ segir Ögmundur við Morgunblaðið og hyggst leggja málið fyrir ríkisstjórnina á föstudaginn. Hvað ætlar Ögmundur sjálfur að gera sem ráðherra sveitarstjórnarmála?

Um áform um olíuhreinsunarstöð í Finnafirði segir Svandís Svavarsdóttir umhverfisráðherra (VG) þau vera „óráðleg“ og bætir við í Morgunblaðinu: „Það er á ábyrgð sveitarfélagsins að tryggja að öll stjórnsýsla sé með réttum hætti, svo sem reglur sem varða hæfi og hagsmunatengsl,“ segir Svandís.

Lára Hanna Einarsdóttir bloggari hefur kynnt sér og skrásett mikið efni sem tengist Huang Nubo og Halldóri Jóhannssyni. Hún segir í nýlegum pistli á vefsíðunni Eyjunni:

„Í 2. mgr. 3. gr. laga nr. 138/1994 um einkahlutafélög er kveðið á um að a.m.k. einn stofnenda félags skuli hafa heimilisfesti hér á landi nema ráðherra veiti undanþágu þar frá. Þá segir í 2. mgr. 42. gr. að minnst helmingur stjórnarmanna félags skuli vera búsettir hér á landi en ráðherra getur veitt frá því undanþágur. Skilyrðin eiga þó ekki við um þá sem búsettir eru innan EES-svæðisins, ríkisborgara OECD-ríkja og ríkisborgara aðildarríkja stofnsamnings Fríverslunarsamtaka Evrópu eða Færeyinga.

Skemmst er frá að segja að efnahags- og viðskiptaráðherra, Steingrímur J. Sigfússon, veitti félögum Nubo Huangs allar þær undanþágur sem með þurfti. Sérstaklega var tekið tillit til þess að framkvæmdastjóri félaganna er íslenskur – en það mun vera Halldór Jóhannsson …“

Rannsóknarstarf Ögmundar Jónassonar hlýtur að hefjast í ráðuneyti Steingríms J. Sigfússonar.

Á Vinstrivaktinni gegn ESB segir 25. júlí: „Það má því segja að spjótin standi á Steingrími J. Sigfússyni, formanni Vg, efnahags- og viðskiptaráðherra og landbúnaðaráðherra, að hann geri hreint fyrir sínum dyrum í þessu máli.“ Þessi orð staðfesta að um innanflokksmál í VG er að ræða eins og varð að lokum í Magma-málinu, þar sem Steingrímur J. gekk í lið með Samfylkingunni. Hann hefur einnig gert það í þágu Huangs Nubos.

Bj. Bj.