Evrópu­samtökin agnúast út í heyrúllur - hengja bakara fyrir smið

Á mbl.is birtist sunnudaginn 5. ágúst þessi frétt með myndinni sem hér fylgir:

mbl/ÓM

„Víða í sveitum landsins má nú sjá rúllubagga með áletrun gegn ESB-aðild. Rúllubagginn á myndinni var við fjölfarinn þjóðveginn um Snæfellsnes, í túnfætinum hjá bænum Gríshóli.

Samkvæmt upplýsingum mbl.is voru límmiðar með áletruninni nýlega auglýstir í Bændablaðinu og kostar hver miði þrjú þúsund krónur.“

Þessi litla frétt og myndin fór fyrir brjóstið á þeim sem heldur um vefsíðu Evrópusamtakanna. Hann segir hinn 6. ágúst:

„Eitt af því sem Bændasamtökin, sem eru jú alfarið á móti ESB-aðild (að mestu leyti eftir að hafa kynnt sér reynslu EINS ESB-ríkis, Finnlands), brugðu á það ráð að gera rúllubaggaáróðursmiða með boðskap gegn ESB. Rúllubaggamiðana á s.s. að líma á rúllubaggana (svona til að auka aðeins á plastið!!).

Sumir forsprakka Nei-samtakanna hafa hoppað hæð sína af gleði og telja þetta mjög vel heppnaða herferð.

Ritari, sem eins og áður sagði, hefur flandrað helling um landið í sumar, hefur hinsvegar aðeins séð þessa and-ESB-límmiða á örfáum bæjum. Og hefur þó keyrt um mikil landbúnaðarhéruð eins og Borgarfjörð, Skagafjörð og um sveitir Norðurlands! Kannski fór þetta allt saman á Suðurlandið og Austur

Samkvæmt opinberum upplýsingum kostar stykkið 3000 íslenskar krónur eða um 20 Evrur.

En hver borgar fyrir framleiðsluna á þessu og auglýsingarnar? Eru það hin skattafjármögnuðu Bændasamtök Íslands?

Ef svo er, þá eru það almennir skattborgarar sem eru að borga þennan brúsa!

Já, Bændasamtök Íslands fara sínu fram - það er engin spurning!“

Hér á Evrópuvaktinni er stuðlað að upplýstri umræðu um ESB-málefni með því meðal annars að birta framlag stuðningsmanna ESB-aðildar á Íslandi til umræðunnar. Það sem birtist hér að ofan sannar enn hvern hug Evrópusamtökin bera til Bændasamtaka Íslands og hve annt áróðursmönnum Evrópusamtakanna er um að hinn upplýsta umræða sé háð á málefnalegum grunni.

Engin samtök hafa unnið eins skipulega að því og Bændasamtök Íslands að kynna málefnalega afstöðu til ESB-aðildarmálsins. Fyrir það uppskera þau ofangreinda heift áróðursmanna Evrópusamtakanna.

Hið sérstaka við þessa árás Evrópusamtakanna á Bændasamtök Íslands er þó, að samtök bænda koma ekkert að þessum límmiðum - þeir eru auglýstir í Bændablaðinu en Heímssýn stendur að gerð límmiðanna. Evrópusamtökin eru vel upplýst eins og fyrri daginn.

Bj. Bj.