Ríkisútvarpið: Gunnar Helgi mildar ummæli Jóhönnu en veitist samt að VG

Jóhanna Sigurðardóttir hljóp á sig í hádegisfréttatíma ríkisútvarpsins mánudaginn 13. ágúst þegar hún sakaði meðráðherra úr VG um „panik viðbrögð“ og rætt var um „kosningaskjálfta“ í óvirðingarskyni við ráðherrana.

hi.is

Gunnar Helgi Kristinsson

Í hádegisútvarpi ríkisútvarpsins þriðjudaginn 14. ágúst tók Gunnar Helgi Kristinsson, prófessor í stjórnmálafræði við Háskóla Íslands, sér fyrir hendur að milda orð Jóhönnu og setja þau í bærilegt samhengi fyrir stjórnarsamstarfið. Hann gerir þó jafnframt lítið úr VG og stöðu flokksins samkvæmt könnunum. Þess er ógetið í fréttinni að fylgi Samfylkingarinnar hefur minnkað mikið frá því í kosningunum 2009.

Gunnar Helgi hefur starfað sem sérlegur ráðgjafi Jóhönnu þótt fréttastofan nefni það ekki þegar hann er kynntur til sögunnar. Látið er sem um óhlutdrægan fræðimann sé að ræða. Hér er fréttin frá Gunnari Helga eins og hún birtist á ruv.is:

„Prófessor í stjórnmálafræði segir að nýja afstöðu þingmanna og ráðherra Vinstri grænna til aðildarumsóknar að ESB, megi líklega skýra með því að kosningar séu á næsta leiti. Flokkurinn standi illa í könnunum og þurfi að marka sér sérstöðu.

Gunnar Helgi Kristinsson, prófessor í stjórnmálafræði, segir ólíklegt að ný afstaða þingmanna Vinstri grænna til aðildarumsóknar að ESB, hafi áhrif á stjórnarsamstarfið. Málið sé bundið í stjórnarsáttmála og ef samstarfinu er slitið á þeim grunni, varpi það skugga á samstarfshæfni flokksins til framtíðar. Nýja afstöðu þingmanna og ráðherra Vinstri grænna megi líklega að hluta til skýra með því að kosningar verði á næsta ári.

„Evrópumálin standa illa að mörgu leyti, virðast ekki njóta mikils stuðnings og VG standa illa líka samkvæmt könnunum. Við erum nú bara að sjá svona byrjun á kosningavetri held ég hlutum sem við munum sjá meira af ábyggilega í vetur þar sem að stjórnarflokkarnir reyna að marka sérstöðu sína,“ segir Gunnar Helga Kristinsson, stjórnmálafræðiprófessor.

Gunnar Helgi er sammála þeirri túlkun forsætisráðherra frá því í gær að um kosningaskjálfta sé að ræða. „Já, ég held að þetta sé nú hluti af því. VG stendur ekki mjög vel í könnunum og þarf að bæta stöðu sína, safna sínu liði saman svolítið og marka sér sérstöðu. Þeim finnst mörgum að þau hafi horfið aðeins í skuggann i stjórnarsamstarfinu við Samfylkinguna og það er ekkert óeðlilegt og ekkert ólíklegt að þau munu vilja fara inn á þessa braut í vetur,“ segir hann.

Gunnar Helgi telur ekki líklegt að þetta muni hafa frekari áhrif á samstarf flokkanna. Til að svo yrði, þyrftu Vinstri græn að vera reiðubúin að slíta stjórnarsamstarfinu á þessum grunni. Það sé ekki líklegt þar sem málið sé bundið í stjórnarsáttmála og að slíta stjórnarsamstarfi á slíku máli varpi skugga á samstarfshæfni Vinstri grænna í framtíðinni.“