Morgunblaðið vekur athygli á sjálfsdýrkun fréttastofu ríkisins

Hér var vakin athygli laugardaginn 19. janúar á sérkennilegri frétt í ríkisútvarpinu um útifund sem Hörður Torfason boðaði til þann dag á Austurvelli. Fjallað er um þessa fréttamennsku á vegum ríkisins í leiðara Morgunblaðsins mánudaginn 21. janúar. Þar segir meðal annars:

„Ríkisútvarpið átti giftudrjúgt samstarf við Hörð [Torfason] þegar Alþingishúsið var grýtt og fleygt í það sora og hvers lags viðbjóði af versta tagi. Auðvitað var sjálfsagt að senda tæki og mannskap á staðinn. En nú tókst svo illa til að varla nokkur maður mætti til viðbótar stjórnlagaráðsliðinu sjálfu og aðstandendum þess. Ríkisútvarpið sagði þannig frá: “Vel yfir hundrað manns sóttu útifund í höfuðborginni í dag þar sem hvatt var til stjórnarskrárbreytinga. Stjórnskipunar- og eftirlitsnefnd Alþingis hyggst vinna að málinu alla helgina. Um 200 manns mættu þrátt fyrir úrhellisrigningu á Austurvöll í dag...„

Það var leitt að fréttin varð ekki miklu lengri því þá hefði fundarmönnum getað fjölgað enn og veðrið versnað að mun. En textavarp Ríkisútvarpsins, sem er að vísu æði sérkennilegt fyrirbæri, bætti úr og sagði fundarmenninna hafa verið um 400. Kannski hefur það verið vegna hins knappa forms að ekki var tekið fram á textavarpinu að sá fjöldi hefði komið þrátt fyrir hvirfilbyl, þrumur og eldingar.

Er ekki rétt að „RÚV“ setji þegar í stað aukinn kraft í auglýsingar um hvað það er frábært og faglegt?“

Síðasta setning leiðarans er umhugsunarefni. Fréttastofa ríkisútvarpsins stundar mestu sjálfsdýrkun allra fréttamiðla þjóðarinnar með auglýsingum í sjónvarpinu. Minnast menn þess að sjá eitthvað sambærilegt í öðrum almanna-sjónvarpsstöðvum? Örugglega ekki – slíkt dómgreindarleysi um eigið ágæti og slík meðferð á opinberum fjármunum yrði hvergi liðið.

Fréttastofa ríkisútvarpsins ætlar að láta verulega að sér kveða í kosningabaráttunni sem er að hefjast. Fréttastofan hefur tekið stjórnarskrármálið í fangið fyrir ríkisstjórnina og málefni hælisleitenda eins og endurteknar fréttir til að draga úr trausti í garð forstjóra útlendingastofnunar sýna. Fleiri viðkvæm pólitísk mál munu fylgja, fréttastofan vill með auglýsingunum bólusetja þá sem enn nota hana en verða að borga brúsann hvað sem er í boði.

Bj. Bj.