Össur er Icesave-ljúflingur Fréttablaðsins

Fréttablaðið segir þriðjudaginn 29. janúar að sjálfsögðu frá niðurstöðu Icesave-málsins í EFTA-dómstólnum. Ólafur Stephensen ritstjóri studdi ríkisstjórn Jóhönnu Sigurðardóttur í gegn þykkt og þunnt í Icesave málinu. Hann segir í leiðara um málið:

„Þótt niðurstaðan í gær hafi verið góð, þýðir hún ekki að það hafi verið röng afstaða að vilja semja um Icesave-málið. Samningaleiðin var viðleitni til að hafa stjórn á niðurstöðunni, sem dómstólaleiðin bauð ekki upp á. Enginn gat séð fyrir með vissu hvernig málið færi fyrir EFTA-dómstólnum og ástæða var raunar til að ætla að niðurstaðan yrði Íslandi ekki jafnhagfelld og raun ber nú vitni, enda hefur Eftirlitsstofnun EFTA haft sigur í langflestum samningsbrotamálum sem hún hefur höfðað fyrir dómnum.“

Þessi skoðun hefur að engu sjónarmið sem kynnt hafa verið allan tímann sem Icesave-deilan hefur staðið um að EES-reglur geri ekki ráð fyrir ábyrgð ríkis á innistæðum í bönkum þegar fjármálakerfi hrynur. Það sjónarmið er meðal annars lagt til grundvallar af EFTA-dómstólnum.

Leiðari Fréttablaðsins lýsir skoðun en fréttirnar og þó sérstaklega myndirnar gefa til kynna áherslur eiganda og ritstjórnar blaðsins. Enginn fer í grafgötur um hver er ljúflingur Fréttablaðsins á þessari stundu:

Forsíða: Össur í faðmlögum við Tim Ward lögfræðing Íslands í Icesave málinu, fyrirsögnin „fullnaðarsigur“. Myndin er bæði há og breið. Össur brosandi út að eyrum.

Bls 4: Stór mynd af Össuri í utanríkisráðuneytinu með þumalfingur á lofti, skælbrosandi, fyrirsögnin: Fallist að öllu leyti á málflutning Íslands. Undir myndinni er síðan texti: „ Össur gefur niðurstöðuna í Icesave málinu til kynna með táknrænum hætti“

Bls 6: Mynd af Össuri og Jóhönnu í ráðherrastólum á alþingi, þau takast í hendur að frumkvæði Össurar en Jóhanna sýnist utangátta, fyrirsögnin „Ísland var neytt að samningaborðinu“. Texti undir mynd „Össur og Jóhanna voru að vonum sátt þegar niðurstaða EFTA dómstóls var ljós“ Neðar í sama ramma mynd af vonsviknum Steingrími J. Sigfússyni.

Össur gegnir aðalhlutverki þegar látið er líta út eins og um mikinn sigur ríkisstjórnarinnar hafi verið að ræða.

Ríkisstjórnin þvingaði Icesave-málið þrisvar fram á alþingi. Hún var jafnoft gerð afturreka með málið. Fréttablaðið leitar ekki að sökudólgi enda vill Jóhanna það ekki. Skyldi Jóhanna ánægð með dálætið á Össuri?

Bj. Bj.