Sýndar­tillaga frá Þór Saari um vantraust á Jóhönnu og stjórn hennar

Kosið verður til alþingis 27. apríl, alþingi er ætlað að ljúka störfum 15. mars en líklegt er að það sitji til 23. mars. Hinn 6. mars flutti Þór Saari, þingmaður Hreyfingarinnar, svofellda tillögu á alþingi:

Þór Saari

„Alþingi ályktar að lýsa vantrausti á ríkisstjórnina.

Alþingi lýsir þeim vilja sínum að þing verði rofið og efnt til almennra þingkosninga. Fram að kjördegi sitji ríkisstjórn skipuð fulltrúum allra flokka á þingi.“

Í greinargerð með tillögunni segir að hún sé flutt þar sem þingið geti „ekki afgreitt frumvarp til stjórnarskipunarlaga byggt á þeim drögum sem samþykkt var að leggja til grundvallar nýrri stjórnarskrá og samþykkt voru með yfirgnæfandi meiri hluta í þjóðaratkvæðagreiðslu 20. október 2012“

Þór Saari segir að að „lýðræðisumbætur sem lofað hafi verið í aðdraganda kosninga í apríl 2009 hafi ekki séð dagsins ljós og enn sé “við lýði ójafn kosningarréttur eftir landshlutum, ójafnrétti í fjármálum stjórnmálaflokka og skortur á persónukjöri og beinu lýðræði„. Þá segir þingmaðurinn:

„Með hliðsjón af því grundvallaratriði í lýðræðisríkjum að allt vald komi frá þjóðinni virðist ríkisstjórnin ganga í berhögg við augljósan vilja þjóðarinnar um nýja stjórnarskrá. Slíkri ríkisstjórn er eðli málsins samkvæmt ekki stætt að vera við völd og ber því að fara frá. Lagt er til að fram að kjördegi sitji ríkisstjórn skipuð fulltrúum allra flokka á þingi í stað þess að fráfarandi stjórn sitji sem starfsstjórn fram að þeim tíma. Með því eru meiri líkur á að sátt náist um mál sem varða hagsmuni þjóðarinnar.“

Óljóst er hvenær þessi tillaga kemur til meðferðar þingsins. Hér er um hreina sýndartillögu að ræða. Tímasetningarnar einar segja allt um það. Sami maður flutti tillögu um vantraust á ríkisstjórnina fyrir tveimur vikum en dró hana til baka þegar átti að taka hana samstundis til umræðu.

Áherslan sem Þór Saari leggur á að fyrir liggi „augljós vilji“ þjóðarinnar um efni nýrrar stjórnarskrár er ekki réttmæt. Þátttaka í skoðanakönnuninni 20. október 2012 var 49%, af þeim töldu 67,5% að leggja bæri tillögur stjórnlagaráðs til grundvallar, það er 75.309 af 236.911 á kjörskrá, það er 161.602 kjósendur voru annað hvort á móti því að tillögur stjórnlagaráðs yrðu lagðar til grundvallar eða létu sér það í léttu rúmi liggja.

Þór Saari lætur þess ógetið í greinargerð tillögu sinnar að um jólin 2011 hét hann og tveir aðrir þingmenn Hreyfingarinnar ríkisstjórninni hlutleysi eða stuðningi þegar Jóhanna Sigurðardóttir bjó sig undir að reka tvo ráðherra úr stjórn sinni. Frá þeim tíma, í 15 mánuði, hefur Þór átt innangengt í stjórnarsamstarfinu og samt lætur hann það gerast að stjórnarskrármálið kemst í eindaga.

Þór ætlar ekki að gefa kost á sér til þings að nýju heldur helga sig baráttu í þágu lýðræðisumbóta utan þings. Standi hann að málum þar á sama hátt og hann hefur gert á þingi er ekki mikils árangurs að vænta. Sýndarmennska skilar hvorki árangri utan né innan þings.

Bj. Bj.