Af hverju heldur Árni Páll áfram að berja höfðinu við steininn?

Árni Páll Árnason

Árni Páll Árnason, formaður Samfylkingarinnar virðist alveg blýfastur í málflutningi um krónuna og evruna, sem er ekki í nokkrum tengslum við veruleikann ef marka má viðtal við hann í RÚV í gærkvöldi.

Hvernig í ósköpunum getur formaður Samfylkingar haldið því fram að eina björgun Íslendinga sé sú að taka upp evru, þegar eftirfarandi er haft í huga:

1. Samfylkingin hélt því fram 2008, að ef Ísland hefði verið aðili að ESB og haft evruna hefði ekkert bankahrun orðið og þá hefði Ísland haft Seðlabanka Evrópu sem lánveitanda til þrautavara.

Staðreynd er að Kýpur er aðili að ESB og evrunni. Þar hrundu bankarnir, þrátt fyrir evruna og þrátt fyrir að Seðlabanki Evrópu hafi átt að vera lánveitandi til þrautavara.

2. Árni Páll Árnason heldur því fram að skuldavandi heimila á Íslandi byggist á verðtryggðri krónu og óverðtryggðum launum og að líf fólk yrði allt annað í þessum efnum ef hér væri evra með lágum vöxtum.

Staðreynd er að Spánn er aðili að ESB og hefur tekið upp evru. Húsnæðismál á Spáni eru í rúst, skuldavandi heimila er yfirþyrmandi og fjölskyldur eru bornar út á götu í stórum stíl af heimilum sínum, sem bankar þar yfirtaka af mikilli hörku. Ástandið er ekki mikið betra á Írlandi.

3. Árni Páll boðar betri tið með blóm í haga ef evran yrði tekin upp hér.

Staðreynd er að atvinnuleysi í ESB-löndum hefur aldrei verið meira og er yfirgengilegt í evruríkjum að ekki sé talað um atvinnuleysi á meðal ungs fólks. Frá Spáni einu landa fluttu 280 þúsund ungmenni á síðasta ári í leit að vinnu til annarra landa.

Hvernig getur formaður Samfylkingar haldið áfram að berja höfðinu við steininn og halda því fram að evran sé allra meina bót?

SG