Hverjir hringdu í Össur vegna Palestínu?

Össur Skarphéðinsson sagði í samtali við blað sem sent er inn á heimili í Reykjavík um helgar og ber nafn höfuðborgarinnar að hann væri stoltastur af því að hafa staðið að viðurkenningu á sjálfstæði Palestínu. Fréttastofa ríkisútvarpsins greip (að sjálfsögðu) samtalið á lofti og ræddi við Össur laugardaginn 6. apríl. Á vefsíðunni ruv.is 6. apríl segir:

Össur Skarphéðinsson á blaðamannafundi í Brussel.

„Össur segir í viðtali í vikublaðinu Reykjavík í dag að hann hafi áður en lagt var til að Ísland viðurkenndi sjálfstæði Palestínu látið gera athuganir á öllum hugsanlegum afleiðingum þess fyrir Ísland. Þá hafi hann fengið símtöl frá Bandaríkjunum. “Þetta voru menn í bandaríska stjórnkerfinu sem gerðu sér grein fyrir því hvað fyrir okkur vakti og voru greinilega annarrar skoðunar,„ segir Össur

Hann segir að símtölin hafi komið frá Nicolas Burns,sem nú er varautanríkisráðherra Bandaríkjanna, og George Mitchell sem er erindreki Bandaríkjastjórnar í Miðausturlöndum.“

Vilhjálmur Örn Vilhjálmsson fornleifafræðingur rýnir í þessi orð Össurar á vefsíðu sinni og segir sunnudaginn 7. apríl:

„Össur segir að George Mitchell, sem var erindreki Bandaríkjastjórnar í Miðausturlöndum hafi hóað í sig út af málinu. Ef svo er, þá hlýtur sú símhringing að hafa verið fyrir 13. maí 2012, er Mitchell sagði af sér embætti sínu.

Með ólíkindum þykir mér að „Nicolas Burns“ hafi einnig verið að hringja í Össur út af þessu prívatmáli Össurar sjálfs, og enn furðulegra að fréttagúrúar RÚV segi Nicolas Burns sé enn starfandi aðstoðarutanríkisráðherra BNA. Það síðast sýnir enn og aftur, að fréttastofa RÚV er þaulsetin viðvaningum

Ef Nicolas Burns, sem tilkynnti Geir Haarde árið 2006 að Keflavíkurherstöðin yrði lögð niður, hefur virkilega hringt í Össur á tímabilinu 2009 til 2012 er Össur gerði Ísland að stuðningslandi Palestínu, þá hefur Burns gert það sem prívatpersóna. Burns lét nefnilega af embætti aðstoðarutanríkisráðherra í janúar 2008 og tók sú uppsögn gildi í mars 2008. Annar möguleiki er líka fyrir hendi, að hér sé Össur að tala um William Joseph Burns (Bill Burns) sem nú er aðstoðarutanríkisráðherra landsins. Svo er líka til þriðji möguleikinn og hann er einfaldlega sá, að Össur sé að ljúga okkur full eins og hann hefur gert signt og heilagt. Lygar um ESB, Nubo, Drekasvæðið, fangaflug, Wikileaks, FBI á Íslandi ópíum handa auðtrúa fylgismönnum núverandi ríkisstjórnar.“

Hverjir hringdu í Össur? Spurningunni er ósvarað þrátt fyrir fréttina hjá ríkisútvarpinu. Fréttin vekur hins vegar enn á ný spurninguna um hvort ekkert gæðaeftirlit ríki við fréttastjórn hjá þessari stofnun.

Hitt er síðan sérstakt umhugsunarefni að Össur skuli flagga þessu máli sérstaklega eftir að hafa varið hundruð milljóna króna í árangurslausar ESB-viðræður sem hann ætlaði að ljúka á 18 mánuðum.

Bj. Bj.