Sjálfstæðis­flokkur: Hvað gerðist frá fimmtudagskvöldi til laugardagsmorguns?

„Vandi Sjálfstæðisflokksins er ekki að baki þrátt fyrir fundinn í dag heldur hefur vandanum einfaldlega verið ýtt inn í framtíðina.“

Þetta voru fyrstu orð í fyrstu frétt fréttastofu RÚV í gærkvöld, laugardagskvöldi og höfð eftir stjórnmálafræðingi.

Eru þetta einhver tíðindi? Er „vandi“ stjórnmálaflokka einhvern tíma „að baki“? Væri það ekki eitthvað skrýtið ef „vandinn“ væri „að baki“?

Stjórnmálaflokkar eru lifandi samtök fólks, sem er sammála um viss grundvallaratriði en greinir á um mörg önnur málefni og líka um einstaklinga í forystusveit. Þannig hefur það alltaf verið og þannig verður það alltaf. Það verða alltaf skiptar skoðanir innan stórra flokka, (og reyndar smáflokka líka) bæði um menn og málefni.

Það þarf ekki annað en líta til annarra landa í þeim efnum. Hefur „vandi“ Íhaldsflokkins í Bretlandi einhvern tíma verið „að baki“? Þar eru bullandi átök öllum stundum og hið sama á við um Verkamannaflokkinn.

Hefur „vandi“ danskra jafnaðarmanna einhvern tíma verið „að baki“? Þar eru bullandi átök þessa stundina um formanninn og forsætisráðherrann.

Ef einhvern tíma kemur að því að „vandi“ stjórnmálaflokka í lýðræðisríki sé „að baki“ er það skýr vísbending um að einræði sé komið á.

Hitt er svo annað mál að átök í flokkum, hvort sem er um menn eða málefni geta farið úr böndum og þá uppskera menn eins og þeir hafa sáð til.

Það sem gerðist í Sjálfstæðisflokknum frá fimmtudagskvöldi til laugardagsmorguns, frá sjónvarpssal til fundar í Garðabæ, var að formaður flokksins brauzt út úr herkví með meiri glæsibrag en lengi hefur sést í íslenzkum stjórnmálum.

SG