„Nýtt“ stjórnmálaafl: Almannavilji er að finna sér sameiginlegan farveg

Það er að verða til nýtt afl í stjórnmálabaráttunni hér, sem nokkuð augljóst er að ríkisstjórnir nú og í framtíðinni verða að taka tillit til og reikna með. Þetta nýja pólitíska afl er almannavilji.

Auðvitað hefur almannavilji alltaf verið til staðar en hann er nú að finna sér sameiginlegan farveg í undirskriftasöfnunum, sem eru auðveldari nú vegna netvæðingarinnar en t.d. þegar Varið land var á ferð fyrir bráðum fjörtíu árum og 55 þúsund undirskriftir söfnuðust.

Nú stendur yfir undirskriftarsöfnun vegna veiðigjalda. Hún hefur gengið ótrúlega vel. Um þrjátíu þúsund undirskriftir á örfáum dögum.

Forseti Íslands gæti staðið frammi fyrir því að svara spurningu um það, hvort hann vísi því máli í þjóðaratkvæðagreiðslu.

Miðað við fyrri aðgerðir hans og yfirlýsingar gæti orðið snúið fyrir hann að hafna slíkri beiðni og örugglega ekki án þess að falla af þeim stalli, sem hann er kominn á.

Það má merkja á viðbrögðum ráðherra að þeir gera sér grein fyrir að þeir standa frammi fyrir óvæntri stöðu.

Þegar Harold MacMillan, fyrrum forsætisráðherra Breta var spurður, eftir að hann hafði látið af embætti, hvað væri það erfiðasta sem stjórnmálamaður stæði frammi fyrir svaraði hann með fleygum orðum:

„Events, dear boy, Events“

Frammi fyrir sannleiksgildi þeirra orða kann núverandi ríkisstjórn að standa.

SG