Ögmundur keppir við Manduro og Ortega vegna Snowdens

Þegar Ögmundur Jónasson var innanríkisráðherra talaði hann á mótmælafundi við bandaríska sendiráðið til að skeyta skapi sínu á Ísraelsmönnum. Hann lenti einnig í útistöðum við ríkissaksóknara og ríkislögreglustjóra af því að hann túlkaði heimsókn starfsmanna FBI hingað til lands en starfsmenn þessara embætta. Hann hefur síðan sagt að FBI hafi verið að snuðra hér undir fölsku flaggi um WikiLeaks.

Ögmundur Jónasson

Óvild Ögmundar í garð Bandaríkjanna er öllum augljós. Hún sannast nú enn þegar hann skipar sér við hlið Nicolas Manduros, forseta Venezúela, og Daniels Oretga, forseta Nikaragva, og vill bjóða Edward Snowden, uppljóstrara frá Bandaríkjunum sem dvelst á Moskvuflugvelli, hæli á Íslandi. Fyrir forsetunum vakir að gera hlut Bandaríkjanna sem verstan því að ekki eru þeir kunnir fyrir ást sína á skoðana- og málfrelsi.

Sex þingmenn fluttu frumvarp til laga á síðustu klukkustundum sumarþingsins um íslenskan ríkisborgararétt fyrir Snowden og látið er eins og bera megi stöðu hans og tengsl við Ísland saman við örlög Bobbys Fischers sem lenti upp á kant við bandarísk yfirvöld fyrir að tefla við Boris Spassky á skákmóti í Serbíu árið 1992 í trássi við viðskiptabann Bandaríkjanna.

WikiLeaks sendir frá sér tilkynningar í nafni Snowdens og meðal annars þakkir til íslensku þingmannanna sex fyrir frumvarp þeirra sem hafði í besta falli eitthvert táknrænt gildi.

Erindisrekstur Julians Assange, stofnana WikiLeaks, og hans manna í þágu Snowdens hefur flækt mál hans og meðal annars skapað spennu innan stjórnkerfis Ekvadors. Assange er sakaður um að hafa blekkt embættismann Ekvadors til að gefa út einhvers konar ferðaheimild í þágu Snowdens sem varð til þess að hann lenti í sjálfheldunni á Moskvuflugvelli og kemst þaðan ekki nema sem laumufarþegi eins og leitin í forsetavél Bolívíu á flugvellinum í Vínarborg sýndi.

Með ráðslagi sínu undir handleiðslu WikiLeaks sýnist Snowden hafa kallað yfir sig vanda umfram það sem áður var. Hann vissi sjálfur að meðferð hans á bandarískum trúnaðarskjölum mundi sæta ámæli bandarískra yfirvalda og fór þess vegna til Hong Kong áður en hann tók að miðla upplýsingum.

Færð hafa verið fyrir því rök að ekki eigi að refsa Snowden um sé að ræða miðlun upplýsinga um opinbera starfsemi sem ekki eigi að fara leynt auk þess hafi verið á vitorði þeirra sem vildu vita að stórfelldar rafrænar njósnir væru stundaðar.

Finna má Snowden ýmislegt til málsbóta. Hann hefur hins vegar lent í slæmum félagsskap og er einkennilegt hve Ögmundi Jónassyni er mikið í mun að slást í þann hóp.

Bj. Bj.