Franz páfi vísar valdamönnum veginn

Frans páfi

Það er hefðbundið, að þegar menn eru komnir í ráðherrastóla reynist almennum borgurum misjafnlega auðvelt að nái tali af þeim og eru þó hinir tæknilegu möguleikar til þess orðnir fjölbreytilegir. Sú skýring, sem nýir valdamenn gefa er að sjálfsögðu miklar annir. Þetta er gömul saga og ný.

Einn er þó sá valdamaður í heiminum, sem virðist hafa nógan tíma. Það er hinn nýi Franz páfi, sem að sögn New York Times, hefur sett skrifræðið í Vatikaninu á annan endann með því uppátæki að hringja sjálfur í fólk, sem skrifar honum bréf.

Fyrir skömmu hringdi páfinn í barnshafandi konu á Ítalíu, sem hafði hafnað ósk barnsföður síns um að fara í fóstureyðingu. Páfinn bauðst til að skíra barnið þegar það fæðist á næsta ári.

Í síðasta mánuði hringdi páfi í konu í Argentínu, sem lögreglumaður hafði nauðgað. Páfinn sagði henni að hún væri ekki ein og hún skyldi hafa trú á réttarkerfinu.

Hinn 7. ágúst sl. tók maður að nafni Michele Ferri á Ítalíu upp símann, sem hringdi. Við hann var sagt: Halló Michele. Þetta er Franz páfi. Michele hélt að einhver væri að gera grín að sér en þegar viðmælandi hans vitnaði í bréf, sem hann sjálfur hafði skrifað páfa áttaði hann sig á að þetta var páfinn sjálfur. Í bréfinu fjallaði Michele um sorglega atburði í sinni fjölskyldu. Síðar í ágúst hringdi páfinn í móður þessa manns.

Þetta er ekki í fyrsta sinn sem hinn nýi páfi brýtur gamlar hefðir. Hann hefur tekið upp á því að hafna þeim lúxus, sem páfar hafa hingað til búið við.

Sennilega geta aðrir valdamenn eitthvað lært af Franz páfa.

SG