Píratar og virðing alþingis - á þetta tvennt saman?

Helgi Hrafn Gunnarsson er þingmaður nýja stjórnmálaflokksins Pírata, hann er fæddur í október árið 1980 og verður því 33 ára á næstunni. Hann sagði meðal annars í umræðum um stefnuræðu forsætisráðherra á alþingi miðvikudaginn 2. október 2013:

Helgi Hrafn Gunnarsson

„Skilningur fólks á sögulegum hugmyndum og atburðum hefur einnig eflst til muna. Það er allt annað að ræða við einhvern í dag um nasisma en fyrir 20 árum. Ég man að í æsku minni var jafnan sagt að Adolf Hitler hafi verið rit- og ræðusnillingur mikill, en með tilkomu internetsins er hægt að fletta upp ræðum hans og metsölubók hans, “Mein Kampf„, og þá fæst fljótt útkljáð að maðurinn var meðalgreindur í mesta lagi og gjörsamlega vonlaus rithöfundur. Þá skilur maður að velgengni hans var fyrst og fremst afleiðing kúgunar og ofbeldis í skjóli almenns vantrausts til lýðræðis og borgararéttinda. Þar með hef ég lært eitthvað af því að lesa ræður úr bók Adolfs Hitlers, en til þess að öðlast þann skilning þurfti ég aðgang að “Mein Kampf„. Ég þurfti að geta lesið ræður hans og reynt að skilja þær á mínum eigin forsendum án tillits til þess hvort yfirvöld eða samtök gegn hatursáróðri ályktuðu sem svo að það væri mér hollt. Allt þetta krafðist þess að ég væri undir nógu litlu eftirliti og nógu frjáls til þess að samskipti við annað fólk, jafnvel stórhættulegt fólk, um viðurstyggilegt málefni sem einkennist nær alfarið af hatursáróðri samkvæmt íslenskum lögum.

Af þessum orðum má ráða að Helga Hrafni þyki annað að ræða um nasisma núna en þegar hann var 13 ára. Hann sagði ekki þingheimi frá því hver þá hefði lýst Adolf Hitler fyrir honum á þann veg að þar hefði farið „rit- og ræðusnillingur mikill“.

Píratar hafa lýst sem markmiði sínu að efla virðingu alþingis. Þessi ræða sem hér er vitnað til hefur örugglega átt að vera framlag flokksins í því skyni. Hún er hins vegar jafnvel verr til þess fallin að auka virðingu alþingis en ákvörðun Jóns Þórs Ólafssonar, þingmanns pírata, um að hætta að nota orðin hæstvirtur og háttvirtur í ræðustól alþingis.

Bj. Bj.