Spegill ríkisútvarpsins fastur í ESB-aðildaráróðri

Arnar Páll Hauksson fréttamaður fór mikinn í Spegli fréttastofu ríkisútvarpsins miðvikudaginn 23. október þegar hann ræddi við tvo ESB-aðildarsinna, Svönu Helen Björnsdóttur, formann Samtaka iðnaðarins, og Margréti Guðmundsdóttur, forstjóra Icepharma, eftir fund með Bjarna Benediktssyni, fjármála- og efnahagsmálaráðherra, á vegum VÍB í Hörpu.

Arnar Páll vildi til dæmis fá staðfestingu á því hvort ekki væri öruggt að ríkisstjórnin og atvinnulífið gengju ekki í takt þar sem meirihluti atvinnulífsins styddi ESB-aðildarviðræðurnar sem hefði verið hætt. Jánkuðu þær stöllur því og Margrét lét hnjóðsyrði falla í garð Sjálfstæðisflokksins fyrir stefnu sem mótuð er af meirihluta flokksmanna – flokkurinn hefði áður fyrr staðið með atvinnulífinu!

Auðheyrt var bæði á máli Arnars Páls og viðmælenda hans að þeim þótti fráleitt að ríkisstjórnin fylgdi þeirri stefnu sem stjórnarflokkarnir boðuðu fyrir kosningar: að gera hlé á ESB-viðræðunum og hefja þær ekki að nýju nema samþykkt yrði í þjóðaratkvæðagreiðslu.

ESB-aðilarsinnar innan og utan ríkisútvarpsins eru sérfræðingar í að berja höfðinu við steininn. Hvenær skyldu þeir átta sig á að ESB-Samfylkingin fékk ekki nema 13% atkvæða í þingkosningunum 27. apríl 2013?

Hitt er síðan annað mál að íhuga notkun fréttamanns ríkisútvarpsins á orðinu „atvinnulíf“. Hvað vakir fyrir honum að nota það orð þegar hann er í raun að vísa til fáeinna fyrirtækja í landinu innan Samtaka iðnaðarins sem berjast vegna eigin hagsmuna fyrir ESB-aðild?

Hvenær skyldi Spegill fréttastofunnar ætla að kanna hvaða hagsmunir ráða hjá þeim sem hæst tala innan „atvinnulífsins“ um ESB-aðild? Þá ættur forráðamenn „atvinnulífsins“ að velta fyrir sér hvort hagur þess batni við að setja sig á háan hest gagnvart meirihluta þjóðarinnar sem vill ekki inn í ESB.

Bj. Bj.