Stjórnar­andstaðan nöldrar vegna hagræðingar - leggur ekkert til málanna

Viðbrögð stjórnarandstöðunnar við tillögum hagræðingarhóps ríkisstjórnarinnar voru eins og við mátti búast. Að kvöldi mánudags 11. nóvember sagði á ruv.is:

Katrín Jakobsdóttir

Katrín Jakobsdóttir, formaður Vinstri grænna, segir það vekja athygli í tillögum hagræðingarhóps ríkisstjórnarinnar að ekki sé búið að kostnaðargreina þær.

Þingmenn stjórnarandstöðu gagnrýndu harðlega á Alþingi í dag að fulltrúar þeirra í fjárlaganefnd hafi ekki fengið að sjá tillögurnar áður en þær voru birtar á vef forsætisráðuneytisins, þrátt fyrir ítrekaðar óskir þess efnis. Í tillögunum séu hins vegar bæði nýjar tillögur og eldri.

Katrín segir að fyrstu viðbrögð sín þau að hér séu tillögur, en þær séu ekki kostnaðargreindar. Hugsanlega liggi einhver gögn á bakvið þetta sem stjórnarandstaðan eigi eftir að fá að sjá, en hér séu þankar á blaði um hvað sé hægt að kanna og skoða að gera.

Róbert Marshall, þingflokksformaður Bjartrar framtíðar, segir óeðlilegt að þingmenn stjórnarandstöðu í fjárlaganefnd hafi ekki fengið kynningu á tillögunum áður en þær voru birtar. Það sé óeðlilegt að stjórnarandstaðan fái að sjá tillögurnar um leið og þingfundur sé að hefjast, á meðan þingmenn stjórnarmeirihlutans séu búnir að fá kynningu á þessum tillögum inni í þingflokkunum. Þannig að það sé mjög mikill aðstöðumunur. Það sé skrýtið að klúðra afhendingu þessarra gagna.

Hverju hefði breytt þótt þingmenn stjórnarandstöðunnar hefðu séð þessar tillögur á undan öllum almenningi? Viðbrögðin einkennast af málefnafátækt, flótta frá því að ræða efni málsins. Af hverju kusu talsmenn stjórnarandstöðunnar ekki að ræða efni málsins? Hafa þeir sjálfir ekkert til málsins að leggja? Eru þeir dæmdir til þess hlutskiptis að jagast í stjórnarflokkunum í stað þess að leggja eittjvað til málanna sjálfir?

Bj. Bj.