Hætta aðildarsinnar sér út í umræður um þróun ESB?

Sumir greinendur hér segja að aðildarsinnar að ESB sæki nú í sig veðrið og hafi sig meira í frammi en áður. Það má vel vera enda þarf ekki mikið til. Þeir voru horfnir og höfðu reyndar skilið Þorstein Pálsson einan eftir á sviðinu.

En hvað sem því líður er ljóst að þeir hafa engan áhuga á að ræða þróun mála innan Evrópusambandsins undanfarin ár. Þeir halda sig við málflutning fyrri ára og láta eins og ekkert hafi gerzt innan ESB frá því að aðildarumsóknin var lögð fram.

Vonandi verður breyting á því alveg á næstunni, þegar skýrsla Hagfræðistofnunar HÍ verður lögð fram um stöðu viðræðna og þróun ESB. Það er æskilegt að almennar umræður fari fram um það sem hefur verið að gerast innan ESB, vandamálin, sem upp hafa komið á evrusvæðinu, afleiðingar hins sameiginlega gjaldmiðils fyrir mörg aðildarríki hans, hið gífurlega atvinnuleysi, sem lítil breyting hefur orðið á, hlutskipti unga fólksins, sem er ömurlegt ekki sízt í Miðjarðarhafslöndunum, þar sem atvinnuleysi meðal ungmenna er sums staðar yfir 50% og jafnvel yfir 60%.

Það er líka æskilegt að ræða þann ágreining sem upp er komin í Evrópusambandinu öllu um hvert skuli stefna, formfastara og miðstýrðara ríkjabandalag eða ekki. Á að halda fast við frjálsa för fólks eða á að setja upp einhverjar hindranir?.

Það verður fróðlegt að kynnast sjónarmiðum aðildarsinna um öll þessi mál - ef þeir þá hætta sér út í þær viðræður.

SG