Reiknikúnstir Fréttablaðsins bitna á Sjálfstæðis­flokknum

Við úrvinnslu tölfræði hjá Fréttablaðinu og framsetningu hallar gjarnan á Sjálfstæðisflokkinn og þá sem eru hlynntir því að Íslendingar standi utan ESB. Á forsíðu blaðsins fimmtudaginn 1. maí er t.d. mynd sem sýnir fylgi flokkanna skv. könnun sem var efnt til í vikunni. Þar er fulltrúafjöldinn eftifarandi:

Sjálfstæðisflokkur – 4 fulltrúar

Samfylking – 4 fulltrúar

BF – 4 fulltrúar

Píratar 1 fulltrúi

VG – 1 fulltrúti.

Þetta stemmir ekki. Þarna vantar inn einn fulltrúa. Borgarfulltrúar eru 15 en ekki 14.

Á bls. 12 í sama Fréttablaði er nánari skýring. Þar mælist Sjálfstæðisflokkurinn hins vegar með 5 fulltrúa og er þar með stærsti flokkurinn í borginni bæði þegar litið er til stuðnings kjósenda og fjölda borgarfulltrúa. Þetta er frétt út af fyrir sig með vísan til gengis flokksins undanfarna mánuði.

Þetta er ekki í fyrsta skipti sem tölur breytast frá forsíðu Fréttablaðsins til nánari útskýringa á innsíðum þess. Hefur má sjá þetta við túlkun á könnunum á viðhorfi fólks til ESB.

Hvað veldur þessu mismunandi mati ritstjórnar Fréttablaðsins eftir því hvar frétt birtist í blaðinu er óútskýrt. Ef til vill lítur ritstjórnin þannig á að menn nenni ekki að fletta blaðinu og láti sér nægja yfirborðskennda en villandi frásögn á forsíðu þess. Tilgangurinn er hins vegar að gera sem minnst úr hlut Sjálfstæðisflokksins því að það er talið gagnast ESB-málstað blaðsins. Hann er ávallt í fyrirrúmi.

Bj. Bj.