Nýr meirihluti í Reykjavík sammála um bitling fyrir Pírata - vill úttekt á misheppnaðri Betri Reykjavík

Nýr meirihluti Samfylkingar, Bjartrar framtíðar, VG og Pírata (9 borgarfulltrúar af 15) í borgarstjórn Reykjavíkur kynnti samstarfssáttmála sinn í Elliðaárdal 11. júní 2014. Þar er hvorki að finna heitstrengingar varðandi Vatnsmýrina né Sundabraut svo að stórmál í borgarstjórn á þessari öld séu nefnd. Í sáttmálanum segir meðal annars:

„Við sem myndum meirihluta í borgarstjórn Reykjavíkur komum úr ólíkum áttum en stefnum nú að sama markmiði. Með hreinskilni og heiðarleika að leiðarljósi ætlum við að læra hvert af öðru og mynda heild sem er auðugri en summa okkar samanlögð.[…]

Við hlustum á alls konar raddir og sköpum þeim vettvang. Með opnari stjórnsýslu verður samræðan upplýstari, ákvarðanatakan skilvirkari og sáttin meiri. […]

Stjórnkerfis- og lýðræðisráð verði fastanefnd í stjórnkerfi borgarinnar. Ráðið hafi það hlutverk að finna og þróa leiðir til að opna stjórnkerfi og bókhald borgarinnar, bæta skilvirkni og viðmót þjónustunnar og auka þátttöku íbúa í ákvarðanatöku.

Stofnað verði embætti erindreka gagnsæis og samráðs sem vinnur með stjórnkerfis- og lýðræðisráði að verkefnum þess.

Unnar verði tillögur um eflingu nærþjónustu og hlutverk hverfaráða.

Gerð verði úttekt á kostum og göllum Betri Reykjavíkur og Betri hverfa og gerðar tillögur um næstu skref í rafrænu þátttökulýðræði.

Unnin verði samþykkt um verkaskiptingu kjörinna fulltrúa og embættismanna.

Hlutverk hvers og eins í þátttökulýðræði verði einnig skilgreint.

Unnin verði samþykkt um framkvæmd íbúakosninga.

Áhersla verði lögð á að nýta opinn og frjálsan hugbúnað, þar sem því verður við komið, á öllum stigum stjórnsýslu og þjónustu.“

Færa má að því rök að meginefni þess sem birt er hér að ofan sé sett inn í samstarfssáttmálann til að koma til móts við Pírata enda verður Halldór Auðar Svansson, oddviti Pírata, formaður nýja stjórnkerfis og lýðræðisráðsins. Þá fá Píratar einnig silkihúfu í ráðhúsinu með nýju embætti – erindreka gagnsæis og samráðs. Er augljóst að Píratar hafa lagt áherslu á að hreiðra sem best um sig innan stjórnkerfis borgarinnar. Erindrekinn er eini bitlingurinn sem nefndur er í sáttmálanum.

Þegar litið er til verkefnisins Betri Reykjavík og lagt mat á framkvæmd þess á árunum 2013 og 2014 sést að það er gjörónýtt tæki til að virkja borgarbúa til þátttöku við töku ákvarðana um hverfi sín.

Dagana 11. mars til 19. mars höfðu 96.854 íbúar í Reykjavík þess kost að láta ljós álit sitt um forgangsverkefni í eigin borgarhverfum. Aðeins 5.005 nýttu sér þennan rétt eða 5,3%, þátttakan var þó 6,3% á árinu 2013.

Í stað þess að viðurkennt sé í samstarfssáttmálanum að verkefnið Betri Reykvíkjavík sé gjörsamlega misheppnað á að verja fé útsvarsgreiðenda til að gera „úttekt á kostum og göllum“.

Bj. Bj.