Sveinbjörg Birna ræðst enn á ný á sjálfstæðis­menn

Framsóknarflokkurinn fékk tvo borgarfulltrúa kjörna í Reykjavík. Atkvæði tóku að streyma til flokksins eftir að orð Sveinbjargar Birnu Sveinbjörnsdóttur um lóð undir nýja mosku voru skýrð á þann veg að hún væri á móti múslímum. Jón Sigurðsson, fyrrv. formaður Framsóknarflokksins, segir að um úthugsað útspil hafi verið að ræða í kosningabaráttunni. Sveinbjörg Birna hafnar því.

reykjavik.is

Úr sal borgarstjórnar Reykjavíkur.

Í morgunþætti á rás 2 miðvikudaginn 18. júní sagði Sveinbjörg Birna að þeir sem kusu Framsóknarflokkinn í borgarstjórnarkosningum af andstöðu við múslíma á Íslandi hefðu veðjað á rangan hest. Ummæli sín í kosningabaráttunni „hafi verið óábyrg og sögð í hálfkæringi. Hún hafi ekki verið að sækjast eftir atkvæðu hatrammra andstæðinga Íslam, og þeir sem kunni að hafa kosið flokkinn á þeim forsendum hafi veðjað á rangan hest,“ segir á ruv.is

Ummælin hefðu ekki verið liður í atkvæðakaupum, og málefnið hefði hvorki verið kosningamál Framsóknarflokksins í Reykjavík né á landsvísu, og viðhorfin sem lesin hefðu verið út úr ummælunum væru ekki í samræmi við stefnuskrá flokksins. Málið hefði snúist um skipulagsmál frá sínum bæjar dyrum séð, hún hefði hlaupið á sig og sjái eftir því. Hún hefði þegar sýnt iðrun. Henni virtist þó sem einhverjir ætluðust til þess að hún „leggist niður og sleiki skóna á því.“

Sveinbjörg hafnaði alfarið ummælum meirihlutans í Reykjavík um að Framsókn væri ekki stjórntæk, stjórnsýslureglur kvæðu á um annað. Framsókn ætti aðalmenn og varamenn í níu stærstu ráðum Reykjavíkur, 7 manna ráðunum, ráð sem tækju í heildina vel yfir 70% af tekjum borgarinnar.

Á visir.is segir að á rás 2 miðvikudaginn 18. júní hafi Sveinbjörg Birna sagt Halldór Halldórsson og sjálfstæðismenn hafa þegið bitlinga frá meirihlutanum í borgarstjórn. Framsóknarmenn skulduðu meirihlutanum ekki neitt.

Reiði oddvita framsóknarmanna í borgarstjórn beinist að því að sjálfstæðimenn hafi fengið fulltrúa í fimm manna stjórnir, Faxaflóahafna og Orkuveitu Reykjavíkur. Telur hún þetta jafngilda „hrossakaupum“ og að „þiggja bitlinga frá meirihlutanum“.

Júlíus Vífill Ingvarsson var kjörinn í stjórn Faxaflóahafna á fundi borgarstjórnar 16. júní en stjórn Orkuveitu Reykjavíkur er kjörin á aðalfundi fyrirtækisins.

Fram hefur komið að Sveinbjörg Birna hafnaði samstarfi við Sjálfstæðisflokkinn við val á mönnum í nefndir og ráð borgarinnar. Hún telur að seta sjálfstæðismanns í stjórn Faxaflóahafna sanni að aðeins Framsóknaflokkurinn verði heill í stjórnarandstöðu. Um sjálfstæðismenn segir hún:

„Ef þeir verða ekki þægir og ganga í takt, þá verður þeim annað hvort hent eftir ár eða þeim klappað.“

Úr því að allir misskildu Sveinbjörgu Birnu þegar hún talaði um moskuna er spurning hvernig á að skilja reiði hennar í garð sjálfstæðismanna. Setur hún þá skör lægra en aðra óvildarmenn?

Bj. Bj.