Evrópu­stofa starfar enn - undir hvaða þrýstingi er utanríkis­ráðherra?

Athygli er vakin á því í leiðara Morgunblaðsins þriðjudaginn 24. júní að Evrópustofa, útibú stækkunardeildar ESB, sem rekin er af þýska almannatengslafyrirtækinu Media Consulta og útibúi þess á Íslandi, Athygli, starfar enn og ætlar að gera eitt ár í viðbót þótt Össur Skarphéðinsson hafi bundið enda á viðræðuferlið við ESB í janúar 2013.

athygli.is

Oddný Harðardóttir fjármálaráðherra og Timo Summa, sendiherra ESB á Íslandi, þegar Evrópustofa var opnum.

Á sínum tíma fór tvennum sögum af því hvort stækkunardeildin hefði opnað stofuna að beiðni Össurar og utanríkisráðuneytisins eða þetta hefði verið til marks um að deildin teldi sér unnt að fara sínu fram í þessu efni.

Einkennilegt er að Gunnar Bragi Sveinsson utanríkisráðherra hafi ekki tekið af skarið um lokun þessa útibús stækkunardeildarinnar í júní 2013 þegar hann áréttaði slit viðræðna og kvað fastar að orði þeirra en Össur gerði í janúar 2013.

Morgunblaðið segir í leiðara sínum:

„Þó að fyrri ríkisstjórn hafi gert hlé á aðlögunarviðræðunum við Evrópusambandið og núverandi ríkisstjórn hafi framlengt þetta hlé og hafi ekki í hyggju að vinna að áframhaldandi aðlögun, heldur áróðurinn fyrir aðild áfram. Eitt skýrasta dæmið um þetta er sú furðulega ákvörðun að framlengja starfsemi Evrópustofu um eitt ár, en starfseminni átti að ljúka í lok næsta mánaðar.

Evrópustofa hóf starfsemi hér á landi í tengslum við aðildarumsókn Íslands að ESB og er starfrækt í þeim tilgangi að bæta ímynd ESB í hugum Íslendinga og reyna að sannfæra Íslendinga um ágæti ESB og um ágæti aðildar Íslands að ESB. Þetta er með öðrum orðum áróðursskrifstofa.

Áróðurinn er margvíslegur. Fyrr í þessum mánuði stóð Evrópustofa til að mynda fyrir kvikmyndasýningum um allt land þar sem enginn aðgangseyrir var rukkaður en merkjum ESB haldið á lofti. Evrópustofa styrkir líka ýmiskonar starfsemi þeirra háskólamanna sem leggja baráttunni fyrir aðild Íslands að ESB lið og Evrópustofa stendur fyrir hátíðahöldum – vitaskuld einnig með ókeypis aðgangi – á þeim degi sem kalla má þjóðhátíðardag Evrópusambandsins.

Áframhaldandi starfsemi þessarar áróðursskrifstofu er hluti þess vanda að Ísland skuli enn vera umsóknarríki um aðild að Evrópusambandinu. Á meðan sú staða er uppi verður áróðrinum haldið gangandi, jafnt af Evrópustofu sem öðrum áhugasömum um inngöngu Íslands í Evrópusambandið. Eina leiðin til að losna við þennan áróður er að Ísland losni úr þeirri stöðu.“

Báðir stjórnarflokkarnir, Framsóknarflokkurinn og Sjálfstæðisflokkurinn, ályktuðu gegn starfsemi Evrópustofu fyrir kosningar til alþingis vorið 2013. Ráðherrum flokkanna er ekkert að vanbúnaði að framfylgja stefnu þeirra í þessu efni. Utanríkisráðherra á að taka af skarið í málinu. Hann þarf ekki annað en rita eitt bréf og þá hættir þessi tímaskakka áróðursstarfsemi í landinu. Undir hvaða þrýstingi er ráðherrann?

Bj. Bj.