Álitsgjafar: Borið í bætifláka fyrir Má með því að sverta Ragnar

Þeir sem bera í bætifláka fyrir Má Guðmundsson seðlabankastjóra fara nú mikinn í því skyni að hafa áhrif á nefndina sem metur hæfi og hæfni þeirra sem sóttu um stöðu seðlabankastjóra eftir að hún var auglýst.

Seðlabanki Íslands

Eftir að auglýsingin birtist voru vangaveltur um hvort Már mundi sækja um embættið að nýju. Þótti ýmsum sem í því fælist vantraust á Má að hann sæti ekki áfram án auglýsingar. Hefur það verið hin almenna regla varðandi þá forstöðumenn ríkisstofnana sem ráðnir eru til fimm ára í senn. Már valdi sjónvarpsspjall við Björn Inga Hrafnsson á Eyjunni til að lýsa ákvörðun sinni um að sækjast áfram eftir starfinu.

Hið sameiginlega í málflutningi þeirra Stefáns Ólafssonar prófessors, Guðmundar Andra Thorssonar rithöfundar og Egils Helgasonar, álitsgjafa og þáttagerðarmanns ríkisútvarpsins, er óvild þeirra í garð Ragnars Árnsasonar prófessors. Hún stafar af því að hann er ekki sömu skoðanir og þeir um hagfræðileg efni auk þess sjá þeir sjálfan Davíð Oddsson í honum! Ómálefnalegri verða menn ekki við mat á umsækjendum um starf.

Guðmundur Andri gengur lengst í að sverta Ragnar og líkir honum við öfgamann, hvorki meira né minna. Þá eiga þeir félagarnir þrír sameiginlegt að gera sem minnst úr augljósum dómgreindarbresti Más Guðmundssonar, ósannindum og yfirhylmingum vegna launamála hans.

Dregin er dökk mynd af skoðunum Ragnars Árnasonar, hann hafi meðal annars varið íslenska fiskveiðistjórnunarkerfið. Að telja það álitshnekki fyrir hagfræðing en minnast ekki á stuðning Más Guðmundssonar við Icesave-samningana segir allt um gildi „faglega matsins“.

Egill Helgason sýnist halla sér að Friðriki Má Baldurssyni prófessor. Egill segir á Eyjunni:

„[M]enntun hans í hagfræði er nær því að henta Seðlabankastjóra en til að mynda sérsvið Ragnars. Friðrik hafði hins vegar afar rangt fyrir sér á árunum fyrir hrun, eins og sást á skýrslu sem hann skrifaði ásamt Richard Portes.“

Hvað sem öðru líður hefur Egill Helgason að sjálfsögðu vit á því hvaða sérsvið hagfræðinnar hentar við stjórn seðlabanka. Hann finnur hins vegar Friðriki Má til foráttu að hafa haft rangt fyrir sér á árunum fyrir hrun en minnist ekki einu orði á hve Má (og raunar Friðriki Má líka) voru mislagðar hendur í Icesave-málinu.

Bj. Bj.