ESB-aðildarsinni skeytir skapi sínu á EES-samningnum - ýtt undir kröfu um uppsögn hans

Jóna Sólveig Elínardóttir hefur unnið að úttekt fyrir framkvæmdastjórn ESB, starfað fyrir sendinefnd ESB á Íslandi og sinnt vefstjórn fyrir Evrópustofu. Nú þegar Jean-Claude Juncker, verðandi forseti framkvæmdastjórnar ESB, hefur lokað á stækkun ESB fram til ársins 2019 og þar með kollvarpað öllum áformum ESB-aðildarsinna á Íslandi ritar Jóna Sólveig grein í Fréttablaðið þriðjudaginn 22. júlí til að lítið úr áformum íslenskra stjórnvalda um að styrkja stöðu Íslendinga gagnvart ESB innan ramma EES-samningsins,

Íslendingar hafa búið við EES-samninginn í 20 ár og fyrir liggur ítarleg skýrsla frá árinu 2007 um leiðir til að styrkja stöðu Íslands innan hans. Tillögunum var aldrei hrundið í framkvæmd vegna þess að innan utanríkisráðuneytisins settu menn stefnuna á ESB-aðild. Sú tilraun misheppnaðist.

Í öllum ESB-ríkjum hafa frjálshuga menn áhyggjur af auknu miðstýringarvaldi ESB-embættismanna í Brussel. Áform um að flytja vald frá Brussel til höfuðborga ESB-ríkjanna setja svip á ESB-umræður í öllum ESB-ríkjunum 28. Það er rangt að segja lýðræðishalla gagnvart þjóðþingum einstakra ríkja bundinn við EES-samninginn – þessi halli er landlægur í samskiptum allra þjóða við Brusselvaldið.

Philip Hammond, nýr utanríkisráðherra Breta, segir að takist ekki að flytja vald frá Brussel til London muni hann mæla með úrsögn úr ESB.

Hið sérkennilega við málflutning ESB-aðildarsinna á borð við Jónu Sólveigu er að þeir telja að með því að hallmæla EES-samstarfinu auki þeir áhuga Íslendinga á að ganga í ESB. Líklegra er hins vegar að hið gagnstæða gerist: þeim vaxi fiskur um hrygg sem vilja slíta EES-samstarfinu.

Rétt er að minnast þess að hefði kröfunni um aðild að ESB verið fylgt eftir af hörku fyrir aldarfjórðungi þegar EES-aðildin var til umræðu á alþingi hefði verið ákveðið að standa bæði fyrir utan ESB og EES.

Ætli ESB-aðildarsinnar á Íslandi enn einu sinni að hefja rógsherferð gegn EES-samningnum í anda greinar Jónu Sólveigar í Fréttablaðinu leika þeir sé að eldi sem þeir geta ekki hamið séu þeir teknir á orðinu. Andstæðingar EES-samningsins munu ganga í lið með þeim og berjast fyrir slitum á öllu samningsbundnu sambandi við ESB.

Að ESB-aðildarsinnar standi svo klaufalega að málum er í samræmi við annað í baráttu þeirra undanfarin ár. Þeir standa í raun fjær því eftir fimm ára umsóknarferli íslenskra stjórnvalda að ná aðildarmarkmiði sínu en nokkru sinni frá því að EES-samningurinn var gerður. Ætli þeir nú að fórna þeim samningi á altari eigin vonbrigða brjóta þeir endanlega allar brýr að baki sér.

Bj. Bj.