Már endurskipaður seðlabanka­stjóri - fyrirvari frá ráðherra í skipunar­bréfi - Már setur einnig fyrirvara

Bjarni Benediktsson, efnahags- og fjármálaráðherra, hefur endurskipað Má Guðmundsson seðlabankastjóra til næstu fimm ára. Líklegt er að skipun Más mælist illa fyrir meðal margra áhrifamanna í viðskipta- og fjármálalífi landsins sem telja Má hafa farið offari í starfi sínu.

Már Guðmundsson

Umboðsmaður alþingis hefur í mörg ár setið á áliti sem lýtur að embættisverkum Más. Þá hefur honum verið stefnt fyrir dóm vegna þess hve seint og illa umboðsmaður hefur tekið á kvörtun gegn Má.

Óánægju gætir meðal sjálfstæðismanna sem telja að Már verðskuldi það síður en svo að hljóta skipun að nýju í ljósi framgöngu sinnar. Hann hafi til dæmis sýnt mikið dómgreindarleysi með málaferlum vegna launakjara sinna og ekki sé upplýst um greiðslur Seðlabanka Íslands af því tilefni.

Allt er þetta sagt hníga til þeirrar áttar að með því að endurskipa Má rýri ráðherra enn traust manna í garð Seðlabanka Íslands.

Í skipunarbréfi til Más lætur Bjarni Benediktsson þess getið að unnið sé að endurskoðun laga um Seðlabanka Íslands og bendir Má á að við breytingu á lögunum kunni staða hans að raskast.

Bjarni segir að nefndin sem endurskoðar lögin um bankann geti tekið einstaka atriði og gert tillögu til sín um það og sé það hlutverk nefndarinnar að gera tillögur sem „treysta trúverðugleika og sjálfstæði bankans og traust á íslenskum efnahagsmálum“. Hún eigi að huga tillögum um „að efla samstarf og skýra verkaskiptingu milli Fjármálaeftirlitsins og Seðlabankans“. Bréfi ráðherra lýkur á þessum orðum:

„Tillögur nefndarinnar geta því leitt til breytinga á stjórnskipulagi Seðlabanka Íslands sem óhjákvæmilega geta haft áhrif á störf yðar hjá bankanum á skipunartíma yðar.“

Miðað við orð sem fallið hafa í aðdraganda þess að Már Guðmundsson fær endurskipun í embætti seðlabankastjóra til ársins 2019 er líklegt að seðlabankastjórum verið fjölgað á næstunni. Skipun Más nú sé í raun til bráðabirgða. Er líklegt að Bjarni Benediktsson verjist gagnrýni úr eigin röðum með þeim rökum.

Þá auðveldar það ráðherranum framhaldið að Már lýsti yfir eftir að hann hlaut skipunina að hann liti sjálfur á hana þeim augum að hann kynni að hverfa til starfa erlendis ef breyting yrði á skipulagi seðlabankans. Má ráða af þeim orðum að hann líti á núverandi skipulag sem hannað var af ríkisstjórn Jóhönnu Sigurðardóttur sem sérsniðið að sér.

Bj. Bj.