Færeyingar sæta gagnrýni í Danmörku fyrir að sýna ekki Úkraínumönnum stuðning

Færeyingar ætla að auka útflutning á eldislaxi til Rússlands og koma þar í stað Norðmanna sem eru á bannlista Rússa. Berlingske Tidende segir að þessi ákvörðun Færeyinga skapi Martin Lidegaard, utanríksráðherra Dana, vanda. Hann verði að þræða einstigi á milli viðskiptabanns af hálfu ESB og tillits til réttar Færeyinga til sjálfsstjórnar innan danska ríkissambandsins.

Lars Hovbakke Sørensen, sagnfræðingur og sérfræðingur í norrænum málefnum, segir við blaðið:

„Vandinn skapast af því að Færeyjar eru ekki í ESB eins og Danmörk. Á sama tíma eru Danir í ríkjasambandi við Færeyinga. Danska stjórnin þarf að hagsmunum beggja og hér verður hagsmunaárekstur.“

Kaj Leo Holm Johannesen, lögmaður Færeyja, ræddi við vara-sjávarútvegsráðherra, Ilja Sjestakov, fyrr í vikunni að sögn Berlingske og gagnrýndi þá refsiaðgerðastefnu ESB. Eftir það fékk hann vilyrði um auknar útflutningsheimildir til Rússlands.

Færeyingar ákveða sjálfir stefnu sína í viðskiptamálum en utanríkisstefnan ræðst af ákvörðunum dönsku ríkisstjórnarinnar. Berlingske segir að útflutningur á laxi sé að sjálfsögðu viðskiptamál en hann sé hins vegar hluti af utanríkismálum þegar kaupandinn er í Rússlandi sem hefur verið sett í skammarkrókinn vegna framgöngu Rússa í Úkraínu.

„Færa má rök fyrir að viðskipti sem hafa afleiðingar á sviði utanríkismála krefjist afskipta dönsku ríkisstjórnarinnar. Frá því sjónarmiði hefðu Færeyingar átt að ræða málið við stjórnvöld í Danmörku áður en tóku það í eigin hendur,“ segir Lars Hovbakke Sørensen.

Martin Lidegaard utanríkisráðherra sendir Berlingske bréf þar sem hann gagnrýnir Færeyinga mildum orðum: „Ég tel að Færeyingar geri sér fulla grein fyrir því sem ESB væntir þess af þriðja landi að það nýti sér ekki stöðuna sem myndast vegna refsiaðgerða ESB.“

Jonas Dahl, talsmaður Sósíalíska þjóðarflokksins um færeysk málefni, segir ummæli utanríkisráðherrans of lin. Honum finnst að Færeyingar eigi að standa með Úkraínumönnum sem séu í miklum. Það kunni að draga fjárhagslegan dilk á sér, eitt sé að Færeyingar reyni að komast hjá þeim annað að þeir gagnrýni Úkraínumenn í sömu andrá.

Danski Einingarflokkurinn telur að Færeyingar gefi vont fordæmi. Þeir ákveði við hverja þeir versli og hvernig en lögmaðurinn hafi farið illa að ráði sínu með að gagnrýni refsiaðgerðirnar gegn Rússum. Af því megi ætla að Færeyingar líti ekki árás Rússa á Úkraínu alvarlegum augum..

Kaj Leo Holm Johannesen lögmaður segir við Berlingske að hann telji sig ekki bundinn af refsiaðgerðum ESB. Hann segir:

„Við erum hluti Vesturlanda og NATO en enginn hefur spurt um álit okkar, enginn hefur spurt hvað okkur finnst. ESB ætti fara rólega, það er erfitt að vita hvað okkur finnst úr því að enginn spyr okkur,“

Bj. Bj.