Huang Nubo enn á ný í fréttum vegna áhuga Kínverja á norðurslóðum

Huang Nubo, auðmaður og fjárfestir frá Kína, er enn fréttaefni, sunnudaginn 28. september í The New York Times (NYT) þar sem Andrew Higgins blaðamaður ritar langa grein um áhuga Kínverja á að ná fótfestu á norðurslóðum. Higgins skrifar grein sína frá Longyearbyen á Svalbarða en af henni má ráða að Huang sé ekki fallinn frá áformum um að eignast land þar sem einkaaðilar vilja selja.

Huang Nubo

Huang er lýst sem manni með fullar hendur fjár en „murky past working for the Chinese Communist Party (óljósa fortíð eftir að hafa starfað fyrir Kommúnistaflokk Kína). Minnt er á að hann hafi ekki fengið að kaupa land á Íslandi en hins vegar hafi hann í maí á þessu ári gert “bráðabirgða-samning„ um að kaupa stóra sjávarjörð fyrir um 4 milljón dollara í Lyngen, ekki langt frá Tromsö í Norður-Noregi.

Þá neitaði Huang Nubo að hann hefði áhuga á að kaupa land á Svalbarða. Nú segir í NYT að málið sé komið á dagskrá að nýju. Í NYT er vitnað í Odvar Nygård, blaðamann við Nordlys í Tromsö, sem segir:

„Það þarf enginn að efast um að milljarðamæringurinn Huang Nubo er útsendari kínverska kommúnistaflokksins og stjórnvalda landsins. Það fær enginn að stunda umsvif á þann hátt sem hann hefur gert síðan á tíunda áratugnum í Kína og erlendis án tengsla við og velvildar ráðandi afla í Kína.“

Í NYT er einnig vitnað í Willy Østreng, forstöðumann Norsku pólrannsóknamiðstöðvarinnar, sem segir: „Hver sá sem hefur áhuga á geopólitík mun fylgjast með því sem gerist á þessu svæði á komandi árum.“ Hann segir að Huang kunni aðeins að vera „venjulegur brosandi fjárfestir“ sem hafi einlægan áhuga á að þróa ferðaþjónustu. Í þessu tilviki ræði menn þó um hvernig þeir skynji eða túlki það sem gerist.

„Þetta er túlkað á þann veg að Kínverjar vilji ná fótfestu á norðurslóðum.“

Østreng bendir á að Kínverjar þarfnist orku og þeir hafi opinberlega lýst áhuga á að láta að sér kveða á norðurslóðum. Þeir hafi sent ísbrjót sinn, Snædrekann, á vettvang, sent vísindamenn til Svalbarða í alþjóðlegum hópum, þeim hafi tekist að fá fasta áheyrnaraðild að Norðurskautsráðinu. Þeim hafi hins vegar ekki verið leyft að reisa stóra ratsjá á Svalbarða.

Þeir hafi meira að segja lýst Kína sem „næstum norðurskautsríki“ jafnvel þótt 1.000 mílur séu frá heimskautsbaugnum að nyrsta odda Kína. Østreng segir: „Þegar þú ert fjölmenn þjóð í stóru landi getur þú krafist hvers sem þú vilt og fólk trúir þér.“

Fram hefur komið að innan norsku ríkisstjórnarinnar sé vilji til þess að ríkið kaupi landið sem einstaklingar vilja selja á Svalbarða. Af greininni í NYT má ráða að fréttir núna um áhuga Huangs á þessu landi kunni að tengjast viðræðum um verðmæti þess. Eigendurnir eru erfingjar norsks útgerðarmanns sem eignaðist það árið 1937. Ekkert land á Svalbarða hefur verið til sölu síðan 1952 og landið sem nú er falt er hið síðasta í einkaeign á eyjaklasanum.

Vimælendur NYT segja að verðmæti landsins kunni að vera frá nokkrum milljónum í meira en milljarð dollara.

Willy Østreng segir að ekki sé unnt að verðleggja eitthvað sem sé „einstakt“. Ekki sé til neitt markaðsverð á landi svo norðarlega vegna skorts á framboði. Verðmæti landsins sjálfs sé lítið vegna þess að enginn vinni lengur kol á þessum slóðum og þeir sem reyni það tapi aðeins á því. „Líti maður hins vegar á strategískt gildi“ segir Østreng „er verðið á þessu land óreiknanlegt.“

Bj. Bj.