Nýtt þjóðernissinnað skoskt dagblað - UKIP segir það áróðurssnepil í anda fasista

Nú á tímum netmiðla er ekki algengt að ný dagblöð sjái dagsins ljós. Það gerðist hins vegar mánudaginn 24. nóvember þegar útgáfufyrirtækið Newsquest hóf útgáfu á blaðinu The National, fyrsta skoska dagblaðinu til stuðnings sjálfstæði landsins. Ákveðið var að hefja útgáfuna eftir þjóðaratkvæðagreiðsluna 18. september 2014 þar sem sjálfstæði var hafnað. The National verður systurblað The Herald og The Sunday Herald.

Áform um útgáfuna voru fyrst kynnt á flokksþingi SNP, skoskra þjóðernissinna. Útgefendur segja að blaðið sé ekki í neinum tengslum við flokkinn. Fullyrðing um það efni er dregin í efa af andstæðingum flokksins og sjálfstæðis Skota.

Hörðust hafa viðbrögðin verið hjá Misty Thackeray, formanni UKIP, flokks breskra sjálfstæðissinna í Skotlandi. Hann sagði að blaðið væri þrællunduð málpípa SNP:

„Hættan er sú að skoska þjóðernishreyfingin snúi aftur til fasískra róta sinna frá fjórða áratugnum.

Fyrst höfum við kynnst töluþrjótum og götuhrottum sem beta ógnunum í baráttunni fyrir sjálfstæði, síðan sjáum við [Nicolu] Sturgeon [nýkjörinn formann SNP] á hópfundum sem minna á Nürnberg og nú þessa McPrövdu, áróðurssnepil.

Skotar þarfnast ekki stjórnmála óendalegra þjóðaratkvæðagreiðslna, heldur hins að allir sætti sig við að meirihluti Skota hefur samþykkt að vera um aldur og ævi í konungssambandinu, og að nei þýðir nei.“

Richard Walker, ritstjóri The National og The Sunday Herald, brást við á þennan hátt:

„Þarna sýnir UKIP sitt rétta andlit. Þeir þola ekkert sem er andstætt skoðun þeirra og hafna því sem fasisma.

Þeir verða að bíta í það súra epli að við munum halda áfram að sinna því verkefni að afhjúpa umburðarleysið í kjarna flokksins.“

Bj. Bj.