Frakkland: Deilt um sölu 49,99% í flugvellinum í Toulouse til Kínverja

Franska ríkið ákvað hinn 4. desember að taka tilboði kínversks fyrirtækis í kaup á 49.99% í flugvellinum í Toulouse í Suður-Frakklandi, fjórða stærsta flugvelli Frakka.. Fyrirtækið ber heitið Symbiose og að baki því standa tvö kínversk félög: Shandong Hi-Speed Group, umsvifamikið í gerð samgöngumannvirkja, og Friedmann Pacific Asset Management, eignarhaldsfyrirtæki í Hong Kong. Þeim til ráðgjafar er kanadíska fyrirtækið SNC-Lavalin sem sérhæfir sig á sviði mannvirkjagerðar. Söluverðið er 308 milljónir evra.

Ákvörðunin um söluna hefur vakið harðar deilur. Frönsk fyrirtæki sem töldu fram hjá sér gengið við þessa einkavæðingu mótmæltu. Hið sama hefur verið gert á pólitískum vettvangi og nú hefur ákvörðunin verið kærð til stjórnsýsludómstóls þar sem í henni felist „valdníðsla“. Ríkið hafi gengið lengra en góðu hófi gegnir og ekki hafi verið gætt að samráði við íbúa í Toulouse í nágrenni við flugvöllinn, starfsmenn né aðra sem málið varðar á heimavelli. Fyrir þessa sök beri að ógilda gjörninginn.

Þá er ríkið sakað um að hafa aðeins litið til fjárhagslegra hagsmuna en látið hjá líða að huga að umhverfis- og öryggismálum og afleiðingum þess að Kínverjar vilji þrefalda umferð um flugvöllinn miðað við það sem hún var árið 2013 en þá fóru 7,5 milljónir farþega um völlinn.

Ríkisstjórn Frakklands er mikið í mun að einkavæðingin á Toulouse-flugvelli nái fram að ganga því að fyrir henni vakir að einkavæða fleiri flugvelli. Á sölulista kunna að verða flugvellir í Nice, Lyon og Bordeaux. Mælast áformin ekki vel fyrir hjá stjórnendum þessara borga. Árið 2011, í forsetatíð Nicolas Sarkozys, boðaði ríkisstjórnin einkavæðingu flugvalla víðsvegar um Frakkland en féll frá áformunum vegna mikillar andstöðu heimamanna.

Bj. Bj.