Minningardagur um Winston Churchill - 50 ár frá andláti hans

Þess er minnst laugardaginn 24. janúar 2015 að 50 ár eru frá því að Winston Churchill andaðist. Hinn mikli leiðtogi Breta og hins frjálsa heims í síðari heimsstyrjöldinni. Að henni lokinni varaði hann við Stalín, einræðisherra Sovétríkjanna, útþenslu heimskommúnismans. Hann flutti ræðu í Westminster College í Fulton í Missouri-ríki í Bandaríkjunum hinn 5. mars 1946 og kynnti þá til sögunnar hættuna á að járntjald mundi kljúfa Evrópu milli austurs og vesturs. Hann sagði meðal annars:

„[Þ]að sem við verðum að íhuga hér í dag, á meðan enn gefst tími til þess, eru leiðir til að koma varanlega í veg fyrir stríð og til að skapa aðstæður fyrir frelsi og lýðræði eins fljótt og verða má í öllum löndum. Við fjarlægjum ekki vandamál okkar og hættur með því að loka augunum fyrir þeim. Það eitt að bíða og sjá hvað gerist mun ekki fjarlægja þær; friðþægingarstefna mun ekki heldur ýta þeim til hliðar. Þörf er á sameiginlegri lausn og því lengur sem tefst að finna hana þeim mun erfiðara verður það og þeim meiri hættur munu að okkur steðja.

Af kynnum mínum af rússneskum vinum okkar og bandamönnum í stríðinu ræðst sú sannfæring mín að þeir dá ekkert meira en mátt og í huga þeirra er ekkert ómerkilegra en vanmáttur, einkum hernaðarlegur vanmáttur. Þetta er ástæðan fyrir því að gamla kenningin um valdajafnvægi er ótraust. Við getum ekki leyft okkur, fáum við því ráðið, að hafa ekki borð fyrir báru, að skapa þeim freistingar sem vilja reyna krafta sína.“

Þessi orð hafa gildi enn þann dag í dag þegar enn eru óleyst mál í samskiptum við Rússa sem kunna að ógna öryggi fleiri en þeirra sem búa í Úkraínu. Enn þann dag í dag virða Rússar hernaðarmátt og hafa skömm á vanmætti.

Bj. Bj.