Rússneskur þingmaður dregur réttmæti sameiningar Þýskalands í efa - vill ná sér niðri á Evrópu­ráðsþinginu

Úr þingi Rússlands, Dúmunni.

Þing Evrópuráðsins samþykkti kjörbréf rússnesku þingmannanefndarinnar á fundi sínum miðvikudaginn 28. janúar en ákvað jafnframt að takmarka umboð rússnesku þingmannanna, þeir hefðu ekki heimild til að greiða atkvæði, mættu ekki vera talsmenn tillagna í nefndum eða á fundum þingsins, gætu ekki tekið að sér að sinna eftirliti með kosningum í einstökum löndum og gætu ekki komið fram fyrir Evrópuráðsþingsins gagnvart öðrum stofnunum. Hafnað var tillögu um að reka rússnesku þingmennina úr Evrópuráðinu með vísan til þess að viðræður við þá kynnu að stuðla að lausn ágreiningsmála. Hin takmörkuðu réttindi Rússa á Evrópuráðsþinginu í Strassborg má rekja til íhlutunar þeirra í málefni Úkraínu og innliminuar Krím í Rússland.

Rússneska fréttastofan Itar-Tass segir að vaxandi reiði sé meðal þingmanna í Dúmunni í Moskvu vegna framkomu þingmanna Evrópuráðsins í garð Rússa. Þar hugi menn að gagnaðgerðum og meðal annars hafi komið fram tillaga um að þingið álykti að sameining Austur- og Vestur-Þýskalands hafi í raun verið innlimun, þar sem ráðamenn vesturhlutans hafi hrifsað allt landið undir sína stjórn á árunum 1989 og 1990.

Nikolaj Ivanov, þingmaður kommúnista, hefur flutt tillögu í þessa veru og hefur henni verið vísað til utanríkismálanefndar þingsins.

Í bréfi sem Ivanov ritaði Sergej Narijstjkin þingforseta segir hann að yfirlýsing um eðli „innlimunarinnar“ í Þýsklandi kunni að vera verðugt svar við því sem ályktað sé á Evrópuráðsþinginu. Sá sé munurinn á því sem gerðist á Krímskaga og í Austur-Þýskalandi, að Austur-Þjóðverjar hafi aldrei fengið að greiða atkvæði á sama hátt og Krímverjar, þeir hafi gengið til þjóðaratkvæðagreiðslu um framtíð sína.

Ríkisstjórnir Vesturlanda sögðu þjóðaratkvæðagreiðsluna á Krím ekki í samræmi við alþjóðalög og allsherjarþing Sameinuðu þjóðanna ógilti hana. Endursameining Þýskalands kom til sögunnar eftir viðræður við sigurvegara í síðara heimsstyrjöldinni og leiðtogar Svoétríkjanna samþykktu hana á sínum tíma.

Heimild: Der Spiegel

Bj. Bj.