Evru-fundur endaði í uppnámi - Schäuble sama hvort Varoufakis gengur um girtur eða ógirtur

Evru-ráðherrahópurinn sat næstum sjö tíma á fundi miðvikudaginn 11. febrúar. Þetta var fyrsti fundur ráðherranna eftir að ný ríkisstjórn var mynduð í Grikklandi. Fundinum lauk án niðurstöðu. Ráðherrarnir komu sér ekki einu sinni saman um fréttatilkynningu.

Wolfgang Schäuble og Yanis Varoufakis heilsast við upphaf fundar í evru-ráðherrahópnum miðvikudaginn 11. febrúar 2015.

Sky News segir að Wolfgang Schäuble, fjármálaráðherra Þýskalands, hafi yfirgefið fundinn án þess að kasta kveðju á aðra ráðherra þar sem honum hafi þótt nóg um málflutning Yanis Varoufakis, fjármálaráðherra Grikkja. Ágreiningur þeirra hafi snúist um orð í drögum að fréttatilkynningu hvort þar ætti að standa orðið amend „breyta“ eða extend „framlengja“ þegar rætt var um lánaskilmála Grikkja.

Aðrar fréttir herma að tillaga að fréttatilkynningu eða sameiginlegri yfirlýsingu fjármálaráðherranna hafi verið á borðinu þegar gríski ráðherrann hringdi til Aþenu til að kanna hug manna þar til textans og kom með þau boð til baka að hann gæti ekki samþykkt tillöguna. Í þessum fréttum segir að Alexis Tsipras, forsætisráðherra Grikklands, hafi eindregið lagst gegn orðalagi sem mætti túlka á þann hátt að hugsanlega yrðu skilyrðin vegna neyðarlána til Grikkja framlengd. Eftir á segja grísk yfirvöld að þau hafi aldrei gefið samþykki sitt við drögum að fréttatilkynningu.

Fyrr í vikunni var Wolfgang Schäuble á fundi G20-ríkjanna í Istanbul í Tyrklandi. Þar var einnig blaðamaður frá Frankfurter Allgemeine Zeitung sem ræddi við Schäuble og minntist meðal annars á þá staðreynd að sem fjármálaráðherra hefði hann í vegna efnahagsvanda Grikkja átt samskipti við sex gríska fjármálaráðherra: Giorgos Papakonstantinou, Evangelos Venizelos, Philippos Sachinidis, Giorgos Zannias, Giannis Stournaras, Gikas Hardouvelis áður en Yanis Varoufakis kom til sögunnar. Spurði blaðamaðurinn hvað Schäuble hefði um Varoufakis að segja, hvort hann væri bjartsýnn eða svartsýnn um að semja mætti við hann. Schäuble svaraði:

„Ég veit það ekki, frekar en fyrri daginn. Auðvitað fylgist maður með þróuninni í mikilvægustu evrópsku samstarfslöndunum. Ég hef lengi haft þá skoðun að verulega mikið sé spunnið í stjórnmálamann í öðru landi sem heyir svo árangursríka kosningabaráttu og nýtur svo mikils stuðnings meðal þjóðarinnar. Ég ber djúpa virðingu fyrir því.“

Þá sagði hann að Varoufakis væri „framúrskarandi hagfræðingur“ sem hefði lagt sig mjög fram í umræðum um „svonefnda evru-kreppu“. Hann minntist einnig á ímynd gríska ráðherrans sem rokkstjörnu: Það kynni að þykja forvitnilegt í fjölmiðlum „hvort einhver girðir skyrtuna eða gengur ógirtur“ en í hans huga skipti það í raun litlu hvort einhver gengi með hálsbindi eða ekki. Varoufakis væri siðmenntaður maður og þegar þeir hittust á fyrsta fundi sínum í Berlín hefði samtalið verið „mjög kurteislegt og eðlilegt“.

Bj. Bj.