Grikkir hafa málað sig út í horn - verða að ræða við þríeykið - fá ekki eina evru án samþykkis þess

Fréttir af fundi evru-ráðherrahópsins mánudaginn 9. mars sýna að Grikkir hafa verið reknir öfugir út með tillögurnar sínar sem þeir töldu að mundu tryggja lokagreiðslu neyðarlánsins frá þríeykinu (ESB/SE/AGS). Ráðherrarnir gera gys að tillögunum og er haft eftir fjármálaráðherra Slóvakíu að væri hann menningarmálaráðherra gæti hann ef til vill ráðið í „bókmenntatextana“ sem Grikkir kynntu en þar sem hann væri fjármálaráðherra vildi hann sjá tölur.

Á þennan hátt gerir ráðherrann gys að orðaflauminum sem flæðir frá Yanis Varoufakis. fjármálaráðherra Grikkja, en ekki má á milli sjá hvort veki meiri athygli nú orðið klæðaburður ráðherrans eða innantómar yfirlýsingar hans.

Grísku ríkisstjórninni hefur verið bent á að hún verði að hljóta samþykki þríeykisins en nú má ekki lengur nota það orð, heldur er talað um „stofnanirnar“ í stað þríeykisins. Þá er ekki heldur lengur unnt að halda fundi fulltrúa Grikklands og þríeykisins í Aþenu heldur hefjast þeir í Brussel miðvikudaginn 11. mars. Í Aþenu tala menn um þetta sem „tæknilegar viðræður“ og láta eins og evru-ráðherrarnir hafi fallist á einhverja nýja pólitíska umgjörð sem er ekki.

Jeroen Dijsselbloem, formaður evru-ráðherrahópsins, sagði eftir fundinn 9. mars að ekki kæmi til neinnar greiðslu til Grikkja nema samkomulag tækist um aðgerðir af hálfu Grikkja um framkvæmd þeirra. Hann sakaði grísku ríkisstjórnina um tímasóun:

„Við höfum varið tveimur vikum til að ræða hver á að hitta hvern, hvar og undir hvaða formerkjum, þetta er hrein tímasóun.“

Eftir að vinstrisinninn Alexis Tsipras varð forsætisráðherra Grikklands hét hann því að þríeykið mundi aldrei framar heimsækja Aþenu. Síðan hefur ráðherrann talað um „stofnanirnar“.

Dijsselbloem sagði að samhliða því sem viðræður hæfust milli Grikkja og þríeykisins í Brussel væri nauðsynlegt að „tæknilegir hópar frá stofnununum [þríeykinu]“ fengju leyfi til að fara til Aþenu til að kynna sér framvindu mála. Yanis Varoufakis sagði að til slíkra heimsókna kynni að koma þætti það nauðsynlegt en bætti við:

„Ímyndi menn sér að fulltrúar þríeykisins myndi hóp teknókrata sem gangi í takt inn í ráðuneyti okkar til að framkvæma misheppnaða áætlun – þá er það liðin tíð.“

Bloomberg-fréttastofan segir að Mario Draghi, forseti bankastjórnar Seðlabanka evrunnar, hafi beitt Varoufakis þrýstingi og sagt honum að hann yrði að sætta sig við að fulltrúar þríeykisins kynntu sér gang mála í Aþenu.

Í gríska blaðinu Kathimerini segir að Zoe Constantopoulou, forseti gríska þingsins, hafi lagt fram tillögu um að þingið kjósi að nýju nefnd til að fjalla um hugsanlegar skaðabótakröfur á hendur Þjóðverjum vegna framgöngu þeirra í síðari heimsstyrjöldinni. Bætist þetta við hótun gríska varnarmálaráðherrans um að senda hælisleitendur, þar á meðal íslamista til Þýskalands, til að hefna fyrir „misréttið“ sem hann telur Grikki beitta.

Antti Rinne, fjármálaráðherra Finna, sagði við Frankfurter Allgemeine Zeitung eftir evru-ráðherrafundinn, að sér þætti eins og gríska ríkisstjórnin vissi ekki sjálf hve mikil fjárþörf hennar væri. Hann taldi af og frá að Grikkir gætu vænst þess að fyrirgreiðslu til þeirra yrði flýtt. Umbætur tækju tíma og til þessa hefði ríkisstjórn Grikklands ekki gripið til neinna handfastra aðgerða

Bj. Bj.