ESB: Írar vilja ekki una Frökkum sér meðferð - vilja einnig aukið svigrúm í ríkisfjármálum

Fjármálaráðherrar ESB samþykktu þriðjudaginn 10. mars tillögu framkvæmdastjórnar ESB um að veita Frökkum að nýju tveggja ára frest til að ná halla á ríkissjóði undir 3%, fyrst átti þetta takmark að nást í ár en fresturinn gildir nú til ársins 2017. Michel Sapin, fjármálaráðherra Frakklands, hafði viljað að fresturinn gilti til 2018 þar sem forsetakosningar eru í Frakklandi árið 2017.

Eftir að fjármálaráðherrarnir höfðu samþykkt tillöguna sagði Sapin:

Michael Noonan

„Evrópa [ESB] er hér til að hjálpa okkur, ekki til að refsa okkur. Í hvert sinn sem menn tala um refsingu leggja þeir lýðræðinu ekki lið heldur ýta undir öfgasjónarmið.“

Þessi orð gefa til kynna að pólitísk sjónarmið hafi ráðið mestu hjá framkvæmdastjórninni, ótti við að krafa um að Frakkar stæðu við það sem þeir lofuðu árið 2013 mundi enn auka fylgi Þjóðfylkingar Marine Le Pen sem mælist nú stærsti flokkur landsins.

Ákvörðunin um að sýna Frökkum linkind hefur meðal annars leitt til þess að Olli Rehn, fyrrverandi efnahagsmálastjóri ESB, sagði í síðustu viku að framkvæmdastjórnin ætti að hafa „hugrekki og vit“ til að segja Frökkum að þeir hefðu ekki gripið til nægilegra umbóta til að eiga þetta skilið.

Eftirmaður Rehns innan framkvæmdastjórnarinnar er Frakki, Pierre Moscovici, fyrrverandi fjármálaráðherra Frakklands. Lagði François Hollande Frakklandsforseti höfuðkapp á að fá sinn mann í þetta embætti, hótaði annars að styja ekki Jean-Claude Juncker sem forseta framkvæmdastjórnarinnar.

Benoit Coeure, stjórnarmaður í Seðlabanka evrunnar, sagði við The Financial Times að innan bankans væru menn „miður sín“ og óttuðust að regluverkið sem var mótað til að koma í veg fyrir að skuldakreppan endurtæki sig kynni „að hrynja“. Hann gaf einnig í skyn að Frakkar nytu góðs af því að vera stórþjóð:

„Það er ávallt mjög mikilvægt að þess sé gætt í Evrópu … að stór ríki fái ekki betri meðferð, þeim sé ekki þolað meira, njóti meiri sveigjanleika en lítil ríki. Það væri í beinni andstöðu við evrópska samrunann.“

Írski fjármálaráðherrann, Michael Noonan, hefur í tilefni af ákvörðuninni um Frakka sagt að Írar þarfnist einnig sveigjanleika. Sagðist hann hafa tekið málið upp við Wolfgang Schäuble, fjármálaráðherra Þýskalands, á fundi evru-ráherrahópsins mánudaginn 9. mars en þegjandi stuðningur Þjóðverja dugði framkvæmdastjórninni til að gera Frökkum þetta góðverk.

Noonan segir að sjónarmið teknókrata ráði of miklu í Brussel, þeir taki ekki mið af því sem við blasi í einstökum löndum. Írska stjórnin vill auka ríkisútgjöld á komandi hausti en telur framkvæmdastjórn ESB setja sér of þröngar skorður þar sem hún líti aðeins á eigin spá um 0,6% hagvöxt en hann sé í raun 3.5%, hinn mesti innan ESB. Írska stjórnin vill auka útgjöld til húsnæðis- og heilbrigðismála en í Brussel benda menn henni á að útgjöld megi ekki aukast umfram hagvöxt.

Írski ráðherrann segir að á sama tíma og framkvæmdastjórnin veiti sex eða sjö ríkjum meira svigrúm sé óviðunandi að haldið sé aftur af Írum.

Bj. Bj.