Politico ætlar að taka mál í Brussel sömu tökum og vefsíðan hefur gert í Washington

Politico er tímarit og öflug vefsíða í Washington, höfuðborg Bandaríkjanna, þar sem blaðamenn skrifa um stjórnmál, strauma og stefnur í Bandaríkjunum. Nú hafa eigendur Politico tekið höndum saman við þýska útgáfufyrirtækið Axel Springer, útgefanda Die Welt, Bild og margra annarra blaða, með það fyrir augum að hefja útgáfu Politico í Evrópu hinn 21. apríl. Í Washington hefur Politico vaxið og dafnað síðan 2006.

Æltunin er að fyrsta efni birtist á netinu 21. apríl en rúmlega 40 blaðamenn víðsvegar um Evrópu munu skrifa fyrir síðuna og vikublað sem kemur út í 30.000 eintökum í Brussel, London, París og Berlín. Markmið Politico er að verða „helsti miðill um stjórnmál og stefnur í Evrópu“. Segja aðstandendur nýju vefsíðunnar að þeir ráði yfir meiri mannafla en nokkur annar miðill í heimi til að fjalla um þau mál sem til umræðu eru tekin.

John Harris, aðalritstjóri Politico og annar stofnandi útgáfunnar, segir að í evrópsku útgáfunni verði sagt frá því sem gerist í stjórnmálum, viðskiptum, öryggismálum og efnahagsmálum. Hann sagði þegar hann kynnti nýju útgáfuna:

„Ég dáist að FT, The Economist og alþjóðaútgáfu The New York Times. Við ætlum að keppa á jafnréttisgrundvelli strax frá fyrsta degi.

Sókn okkar í Evrópu er í raun langstærsta verkefni okkar. Ég geri mér ekki í hugarlund að við verðum stærstir eftir eitt ár, við verðum þó örugglega markverður þátttakandi í evrópskum skoðanaskiptum.“

Notendur vefsíðunnar www.politico,eu sem verður opnuð 21. apríl greiða fyrir aðgang að hluta efnis hennar. Hinn 23. apríl hefst dreifing vikublaðsins í 25.000 til 30.00o eintökum í Brussel og á helstu samgöngumiðstöðvum álfunnar eins og í London, París og Berlín.

Harris sagði að fjárfestingin í útgáfunni næmi „umtalsverðri sjö stafa tölu“.

Ryan Hearth, fyrrverandi ráðgjafi Josés Manuels Barrosos, fyrrverandi forseta framkvæmdastjóra, og Neelie Kroes varaforseta, verður helsti ESB-fréttaritari Politico og skrifar morgunpistil um það sem efst er á baugi í Brussel þar sem ritstjórnarskrifstofurnar verða.

Matt Kaminski, ritstjóri Politico í Evrópu, segir: „Við reynum að finna þá sem vita eða skilja hvers vegna Politico fjallar á svo einstakan hátt um mál…. hið minnsta þurfum við Evrópumenn sem hafa aðgang að heimildarmönnum.“

Politico sagði frá því í september 2014 að samvinna hefði tekist við Axel Springer um sameiginlega útgáfu í Evrópu og síðan var skýrt frá því að fyrirtækin ætluðu að kaupa fjölmiðilinn European Voice í Brussel. Með því fengist „fótfesta“ fyrir evrópska stoð Politico. Í boði væri efnismiðlun á netinu bæði með ókeypis og áskriftar aðgangi auk prentmiðils.

Shéhérazade Semsar-de Boisséson, eigandi og útgefandi European Voice. starfar áfram við fyrirtækið og stjórnar viðskiptahlið þess í Evró

Bj. Bj.