Vinstri grænir eiga eina útleið eftir

Vinstri grænir eru í vanda staddir. Þeir eru að tapa trúverðugleika sínum gagnvart kjósendum af því að þeir bera kápuna á báðum öxlum í grundvallarmálum eins og ESB og Icesave. Þó eiga þeir sér smávon, ef þá einhver kjarkur er eftir á annað borð í þeirra herbúðum.

Nú eru á leiðinni frá Brussel fjórir milljarðar króna, sem á að nota til þess að greiða fyrir inngöngu Íslands í ESB. Hins vegar vill svo til að til þess að Brussel geti reitt þessa fjóra milljarða fram þarf að koma mótframlag frá Íslandi upp á einn milljarð króna.

Eftir tvær vikur verður lagt fram á Alþingi fjárlagafrumvarp fyrir árið 2011. Annað hvort verður gert ráð fyrir þessum milljarði þar eða hann birtist á borðum þingmanna í meðförum þingsins.

Kjarninn í fjárlagafrumvarpinu verða hins vegar tillögur um tugmilljarða niðurskurð á ríkisútgjöldum og þá fyrst og fremst til velferðarmála, heilbrigðiskerfis, skólakerfis, almannatryggingakerfis o.sv. frv.

Ætla Vinstri Grænir að samþykkja þann niðurskurð en greiða á sama tíma atkvæði með milljarðinum á móti fjórum milljörðum frá Brussel?

Með því að neita að samþykkja milljarðinn koma þeir í veg fyrir að fjórir milljarðar streymi til Íslands frá Brussel, sem einhver í þeirra hjópi hefur kallað mútufé.

Ef Vinstri grænir hafa ekki dug í sér til þess að hafna þessum milljarði hafa þeir ekki dug í sér til neins.