Hvernig skýrir Össur vanda Íra?

Talsmenn þess að Ísland gangi í Evrópusambandið og taki upp evru sem gjaldmiðil þögn uðu um skeið sl. vor, þegar í ljós kom að evran og aðild að ESB hafði ekki komið í veg fyrir að Grikkland lenti í svo stórfelldum efnahagsvanda að ríkið hefði orðið gjaldþrota ef ekki hefði komið til sameiginleg aðstoð frá Alþjóða gjaldeyrissjóðnum og Evrópusambandinu. Fram að þeim tíma hafði Össur Skarphéðinsson, utanríkisráðherra haldið því fram, að ekkert hrun hefði orðið á Íslandi ef við hefðum verið aðilar að ESB. Hann þagnaði um skeið en hóf að gefa þessar yfirlýsingar á ný um miðjan júní erlendum blaðamönnum til mikillar undrunar.

Nú er annað aðildarríki Evrópusambandsins og evrusvæðisins á sömu leið og Grikkland, þ.e. Írland. Sá er þó munur á að Írland er að falla tveimur árum eftir að fjármálakreppan skall á. Fyrstu viðbrögð Íra við þeirri kreppu voru talin til fyrirmyndar. Þeir lýstu yfir ríkisábyrgð á írska bankakerfinu, lækkuðu laun opinberra starfsmanna um 13% og fóru í víðtækar aðahaldsaðgerðir að öðru leyti. Írum var hrósað innan ESB og talið að önnur ríki ættu að fylgja fordæmi þeirra.

Nú er svo komið, að þrátt fyrir að gera allt, sem þeim var sagt að gera eru Írar í stórfelldum vandræðum. Írska bankakerfið riðar til falls. Fjárlagahallinn æðir upp úr öllu valdi , hefur staðið í 12% og stefnir í 25% og þar er enginn hagvöxtur tveimur árum eftir að fjármálakreppan skall á heldur samdráttur í landsframleiðslu á öðrum ársfjórðungi þessa árs.

Og meira að segja! Í nýrri írskri skýrslu um bankakerfið þar í landi er sérstaklega að því vikið, að Íslendingum hafi tekizt betur að fást við vandamál íslenzku bankanna heldur en Írum að takast á við vanda sinna banka!

Í hnotskurn: Aðild Írlands að ESB og evrunni hefur ekki komið í veg fyrir að Írar hafa lent í svo stórfelldum vandamálum, að skuldatryggingaálagið á þrjá banka á Írlandi er að nálgast það sem það var á íslenzku bankana skömmu fyrir hrun þeirra.

Hvernig ætli Össur Skarphéðinsson, utanríkisráðherra Íslands útskýri þessi vandamál Íra? Hvernig ætli hann komi heim og saman þeim málflutningi sínum á erlendri grund, að aðild að ESB og evrunni hefði komið í veg fyrir hrunið á Íslandi þegar hið sama er að gerast í evrulandinu Írlandi?

Össur getur það að sjálfsögðu ekki. Vandi Íra er enn ein staðfesting á því, að við Íslendingar erum betur komnir utan ESB en innan.