Á þröngsýni og ein­stefna að ráða í Háskóla Íslands?

Það er að sjálfsögðu ekkert að því að Alþjóðamálastofnun Háskóla Íslands standi fyrir umræðum um málefni Íslands og Evrópusambandsins. Það er eðlilegt að þau séu rædd á vettvangi Háskóla Íslands og raunar annarra háskóla í landinu. Öllum öðrum fremur eiga háskólar að vera vettvangur opinna og frjálsra umræðna. Þannig verða nýjar hugmyndir til og háskólar eiga að vera uppspretta nýrra hugmynda. Það eru líka beztu háskólar í heimi og lykillinn að þeim mikla árangri, sem þeir hafa náð.

Það sem er hins vegar athugavert er, ef einstakar háskólastofnanir standa fyrir einhliða umræðum um málefni í staðinn fyrir opnum umræðum. Alþjóðamálastofnun Háskóla Íslands situr föst í því feni. Hún stendur fyrir umræðum um Ísland og ESB en þær eru einhliða og raunar óskiljanlegt að þeir sem að stofnuninni standa skuli láta það óátalið. Það er líka óskiljanlegt að yfirvöld Háskóla Íslands láti þessa misnotkun á nafni háskólans afskiptalausa. Það er markmið Háskóla Íslands að verða einn af 100 beztu háskólum heims. Það verður aldrei ef Háskóli Íslands verður vettvangur einhliða umræðna um málefni í staðinn fyrir að vera vettvangur opinna, frjálsra og örvandi umræðna.

Í dag segir Morgunblaðið frá því, að Alþjóðamálastofnun Háskóla Íslands sé einn þeirra aðila, sem vilji taka að sér að reka kynningarstarfsemi fyrir Evrópusambandið og þá m.a. þær upplýsingamiðstöðvar, sem ætlunin er að reka í Reykjavík og á Akureyri. Hinar fyrirhuguðu upplýsingamiðstöðvar eru að sjálfsögðu áróðursmiðstöðvar. Hvers vegna halda menn að Evrópusambandið sé að eyða í þettta peningum?

Það er með ólíkindum og því miður Háskóla Íslands til skammar.

Misnotkun á nafni Háskóla Íslands í þágu baráttunnar fyrir aðild Íslands að Evrópusambandinu er komin á það stig, að yfirvöld Háskóla Íslands geta ekki lengur þagað. Háskólinn er stofnun sem er fjármögnuð með fé allra skattgreiðenda á Íslandi. Stór hluti þeirra skattgreiðenda er andvígur aðild Íslands að Evrópusambandinu. Eiga þeir með skattfé sínu að fjármagna baráttuna fyrir aðild?!

Innan Háskóla Íslands hljóta menn að staldra við og hugsa sinn gang hvar í flokki sem þeir standa. Með þessu háttalagi er verið að eyðileggja það traust sem byggt hefur verið upp á bráðum hundrað árum. Það er ekkert vit í því fyrir Háskóla Íslands sem stofnun að láta sem ekkert sé. Þessa misnotkun á nafni Háskólans verður einfaldlega að stöðva. Það er þessari merku menntastofnun ekki til framdráttar að taka að sér áróðursstarfsemi fyrir Evrópusambandið á Íslandi.

Við eigum sem þjóð að veita Háskóla Íslands þann stuðning, sem skólinn þarf til þess að ná því marki að verða talinn einn af beztu háskólum í heimi. Við getum náð því marki þótt við séum fá og smá. En þá verða vindar frjálsra og opinna umræðna að blása um Háskóla Íslands. Ekki þröngsýni og einstefna áróðursmanna.