Stjórnar­samstarfið er í rúst eftir fréttir síðustu daga

Forsíðufrétt Morgunblaðsins í fyrradag um fund sexmenninga í þingflokknum til þess að ræða afstöðu þremenninga til fjárlagafrumvarpsins hefur valdið slíkum usla í herbúðum ríkistjórnar og stjórnarflokka að langt er síðan frétt um pólitíska viðburði að tjaldabaki hefur haft slík áhrif.

Fyrstu viðbrögð forystumanna Samfylkingarinnar voru að trúa ekki fréttinni. Þeim varð fljótlega ljóst, að hvort sem þeim líkaði betur eða ver yrðu þeir að horfast í augu við að fundurinn var haldinn enda staðfesti Ögmundur Jónasson, sem sæti á í ríkisstjórn að fundurinn hefði verið haldinn. Hvort formleg ákvörðun eða óformleg um hjásetu þremenninganna var tekin á meðan setið var við borð eða eftir að staðið var upp skiptir auðvitað engu máli.

Fyrstu viðbrögð Árna Þórs Sigurðssonar, starfandi formanns þingflokks Vinstri grænna voru að gefa í skyn að frétt Morgunblaðsins væri röng. Það eru hefðbundin og áratugagömul viðbrögð vinstri manna við því, þegar Morgunblaðið birtir fréttir úr innsta hring þeirra, sem þeir eiga erfitt með að sætta sig við að hafi lekið út.

Bæði Steingrímur J. Sigfússon og Árni Þór Sigurðssyni hafa haft uppi innihaldslausar hótanir í garð andófsmanna í þingflokki VG, sem bíta ekkert vegna þess, að hvorugur þeirra hefur nokkra möguleika á að framfylgja þeim hótunum. Í slíkum tilvikum er skynsamlegra að láta hótanir liggja á milli hluta.

Í framhaldi af því uppnámi, sem varð í stjórnarherbúðum vegna ofangreindrar fréttar birti netútgáfa Morgunblaðsins, mbl.is, frétt um umræður innan Samfylkingarinnar um stöðu eins þingmanns Vinstri grænna, Lilju Mósesdóttur, sem Atli Gíslason, annar þingmaður VG hefur líkt við pólitískt einelti.

Að Lilja Mósesdóttir sé lögð í einelti af þingmönnum Samfylkingar kemur ekki á óvart. Þessi þingmaður hefur á stuttum þingferli náð þeirri stöðu að meira og betur er á hana hlustað en flesta aðra þingmenn, hvort sem er í stjórn eða stjórnarandstöðu nú um stundir.

Viðbrögð stjórnar þingflokks Samfylkingar voru þau að senda frá sér yfirlýsingu, þar sem nánast var sagt að frétt mbl.is væri ósannindi einber. En skömmu seinna staðfesti einn þeirra, sem skrifaði undir þá yfirlýsingu að slíkar umræður færu fram á vettvangi, sem stjórn þingflokksins sagði að væri ekki til!

Hvað þýðir þetta? Þetta þýðir að stjórnarsamstarfið er í rúst og fréttir Morgunblaðsins og mbl.is hafa veitt almenningi innsýn í ormagryfju, sem er með þeim ógeðslegri, sem sést hafa í íslenzkri pólitík á síðari tímum og hafa þær þó verið margar.

Þetta þýðir hins vegar ekki að ríkisstjórnin sé að fara frá. Hún mun sitja eins lengi og sætt er. En þetta þýðir hins vegar, gagnstætt því sem ætla mátti fyrir nokkrum vikum, að það eru minni líkur en meiri á því, að ríkisstjórnin sitji út kjörtímabilið.

Það kann að vera styttra í kosningar en margir halda.