Orðhengilsháttur Össurar og einfeldningsháttur Árna Þórs varða ESB-leiðina

Össur Skarphéðinsson utanríkisráðherra reynir að bjargar sér frá því að hafa samið af sér gagnvart ESB í samtali við sjónvarpsfréttastöðina Euronews 27. júní með orðhengilshætti. Hann hafi talað um „sérstaka undanþágu“ en ekki sérlausn. Með sérlausnum verði unnt að tryggja hagsmuni Íslands gagnvart sjávarútvegsstefnu ESB en Íslendingar þurfi enga sérstaka undanþágu frá sjávarútvegsstefnunni. Hann hafi alltaf viljað sérlausnir eins og Finnar hafi fengið fyrir heimskautalandbúnað og Maltverjar fyrir veiðar á um 1.000 tonnum á fiski með smábátum umhverfis eyjar sínar í Miðjarðarhafi.

Þessi tilraun Össurar til að milda afleik sinn er dæmd til að mistakast, jafnvel þótt hann segist hafa talað í svipaða veru á alþingi 16. júlí 2009. Þau orð hans hafa einmitt verið gagnrýnd sem uppgjöf gagnvart meginþætti sjávarútvegsstefnu ESB sem felst í því að 200 mílna lögsaga Íslands félli með aðild undir hafsvæði ESB og þar með forræði framkvæmdastjórnar sambandsins og réttur Íslands sem strandríkis samkvæmt hafréttarsáttmála Sameinuðu þjóðanna hyrfi einnig í hendur framkvæmdastjórnarinnar.

Össur bindur afstöðu sína við óskráða og óvissa reglu innan ESB um svokallaðan hlutfallslegan stöðugleika í fiskveiðum. Innan ESB gera menn lítið úr framtíðargildi þessarar reglu. Unnt er að hnekkja henni með meirihlutaákvörðun ráðherraráðs ESB að tillögu framkvæmdastjórnarinnar. Feli hún í sér mismunun fellir ESB-dómstóllinn hana úr gildi verði látið á málið reyna fyrir honum.

ESB-ríkin hafa farið svo illa með fiskimiðin á ESB-svæðinu undir stjórn framkvæmdastjórnar ESB að eftir 3. júlí á þessu ári er allur fiskur sem neytt er í ESB-ríkjunum innfluttur. Hann er með öðrum orðum keyptur af öðrum þjóðum eða veiddur í úthafinu eða í lögsögu ríkja sem ekki eru í ESB. Hvaða Íslendingur trúir því að ekki verði í krafti meirihluta innan ESB og með tilstilli framkvæmdastjórnar ESB ákveðið að nýta Íslandsmið beint í þágu ESB-skipa?

Í fyrstu atrennu yrði veiðikvóti íslenskra skipa á makríl minnkaður í þágu skoskra og írskra skipa. Síðan myndi framkvæmdastjórn ESB færa sig upp á skaftið stig af stigi eins og hún hefur gert við eyðileggingu fiskimiða ESB-þjóðanna sem eitt sinn voru meðal hinna gjöfulustu í veröldinni.

Össur Skarphéðinsson vill ekki neina varanlega undanþágu Íslands undan þessari eyðingarstefnu ESB. Hann segist vilja sérlausn, það er tímabundna aðlögun að ofurvaldi framkvæmdarstjórnar ESB.

Árni Þór Sigurðsson, formaður utanríkismálanefndar alþingis, var í för með Össuri í Brussel 27. júní 2011 þegar þeir hófu hinar „eiginlegu samningaviðræður“ við ESB með því hugarfari sem Össur lýsti síðan í samtalinu við Euronews. Árni Þór lætur nú eins og hann komi af fjöllum en ekki úr Brussel-förinni með Össuri þegar hann áttar sig á því hvað fólst í orðum Össurar í Euronews. Árni Þór segir í Morgunblaðinu 5. júlí að Össur þurfi að skýra betur ummæli sín betur og segir síðan orðrétt:

„Mín afstaða er sú að við þurfum sérstaka lausn í sjávarútvegsmálum, sem byggist á okkar hagsmunum eins og við vísum til í nefndaráliti [meirihluta utanríkismálanefndar]. Einhverjar tímabundnar undanþágur eða eitthvað þess háttar er að mínu viti alveg ófullnægjandi. En ég hef ekki trú á því að það hafi verið það sem Össur var að tala um.“

Lokaorðin í hinum tilvitnaða texta eru dæmigerð fyrir afstöðu þingmanna vinstri-grænna. Þeir sjá eitthvað en kjósa að trúa ekki sínum eigin augum af því að þá þurfa þeir að viðurkenna að þeir láta draga sig á asnaeyrunum inn í ESB-vef Samfylkingarinnar.

Hvernig væri að Árni Þór Sigurðsson boðaði utanríkismálanefnd alþingis til fundar og fengi úr því skorið um hvað Össur var að tala?